Waşington-SANA
Nûnerê Taybet ê Amerîkî ji bo Sûrîyê, Thomas Barak, bang li Encumena Nûneran a Amerîkî kir ku li pey Encumena Pîran biçe û ji bo biryara betalkirina Qanûna Qeyser li ser Sûrîyê deng bide, dîyar jî kir ku ev yek dê bibe alîkar ji bo başbûna aborîya Sûrîyê û lezandina pêvajoya jinûveavakirinê.
Di gotareke ku li ser hesabê xwe yê “X”ê weşand de, Barak got: “Encumena Pîran dûrbînîyek nîşan da bi dengdana ji bo betalkirina Qanûna Qeyser ji bo parastina sivîlan li Sûrîyê, ku pergaleke cezayan e ku xizmeta armanca xwe ya exlaqî li dijî rejîma xiniz û hovane ya Esed kir.”
Nûnerê Amerîkî da zanîn ku dema Kongreyê di sala 2019an de Qanûna Qeyserê derxist, cîhanê şahidîya hovîtîyên ku nayên efûkirin dikir û ceza ji bo wê gavê amûra guncaw bû, lê Sûrîya piştî 8ê Kanûna 2024an, ne Sûrîya 2019an e û ne jî hikûmetawê ya berê ye.
Barak bi bîr anî ku Serokê Amerîka Donald Trump di 13ê Gulana borî de ji Rîyadê rakirina cezayên li ser Sûrîyê ragihandibû û paşê ev daxuyanî veguherand sîyasetekê dema ku bi fermana cîbicîkar a fermî di 30ê Hezîrana borî de piranîya cezayên li ser Sûrîyê, ji 1ê Tîrmehê ve, betal kir.
Barak tekez kir ku betalkirina cezayan ne xêrpêkirinek lê stratejî ye, ji ber ku ew rê li ber şîyana hevalbend û veberhênerên ji sektora taybet ji bo jinûveavakirina torên elektrîk, av, dibistan û nexweşxaneyan li Sûrîyê vedike, loma betalkirina cezayan ne razîkirin lê pêdivî ye.
Barak anî ziman ku bîst û şeş ji oldarên payebilind ên Mesîhî li Sûrîyê bang li Kongreyê kirin ku cezayan bi dawî bîne û got: ““Sûrîye piştî salên şer ji hev ketiye û ji hal ketiye,” û tekez jî kir ku tu tevna aştîyê nikare temam bibe dema ku yek ji kevntirîn şaristanîyên cîhanê di wêranîyê de be.”
