Şam-SANA
Serok Ehmed El-Şeri’ îro înê di daxuyanîyekê de li ser hesabê xwe yê Xê got: “Salek di ser wergirtina emaneta serokatîya Komara Sûrîyê re derbas bû; ez tê de fedakarîyên Sûrîyan û bihnfirehîya wan di hemû qadan de tînim bîra xwe, û ji Xwedê daxwaz dikim ku ez li gorî vê bawerîyê bim.”
Serok El-Şeri` her wiha got: “Em ê paşerojê bi hev re ava bikin, bi dadperwerîyeke xurt, aramîyeke mayînde û geşepêdaneke berfireh ku cihê Sûrîyê vedigerîne û daxwazên kur û keçên wê pêk tîne.”
Di 29ê Kanûna Paşîn a 2025an de, kongreya ragihandina serkeftina Şoreşa Sûrîyê li Koşka Serokatîyê li Şamê hat lidarxistin, bi beşdarîyeke berfireh ji alîyê hêzên Rêveberîya Operasyonên Leşkerî û hêzên şoreşa Sûrîyê ve.
Kongre bû qonaxeke werçerxanê ya girîng; tê de Ehmed El-Şeri’ wekî Serokê Komarê hat erkdarkirin, hemû hêzên leşkerî û dezgehên sîyasî û sivîl ên şoreşgerî hatin betalkirin û di nav sazîyên dewletê de hatin yekkirin.
Her wiha kongreyê biryar da ku 8ê Kanûna Yekem a her salê wekî Roja Niştimanî ji bo bîranîna rizgarkirina Sûrîyê ji rejîma berê were pejirandin. Ligel vê yekê, xebata bi destûra 2012an hat rawestandin, hemû qanûnên awarte hatin betalkirin, artêşa rejîma berê hat hilweşandin û Artêşa Sûrîyê li ser bingehên niştimanî ji nû ve hat avakirin.
Di nav biryaran de hilweşandina dezgehên ewlehîyê yên ser bi rejîma berê ve û avakirina sazîyeke ewlehiyê ya nû ya ku ewlehîya hemwelatîyan diparêze hebû. Her wiha, Encumena Gel, Partîya Bees a Erebî ya Sosyalîst, partîyên Bereya Niştimanî ya Pêşverû û hemû rêxistin, sazî û komîteyên ser bi wan ve hatin hilweşandin û jinûveavakirina wan di bin her navekî de hat qedexekirin.
