Waşington-SANA
Serok Ehmed El-Şeri’ pêwîstîya rakirina cezayan ji ser Sûrîyê tekez kir, da ku piştî salên şer derfetek ji bo başbûna wê were dayîn.
Piştî hevdîtina bi hevtayê xwe yê Amerîkî Donald Trump re li Koşka Spî, Serok El-Şeri’ di hevpeyvînekê de bi rojnameya Washington Postê re got: “Ji sîyaseta Serok Trump eşkere ye ku ew piştgirîyê dide aramîya Sûrîyê, yekîtîya axa wê û rakirina cezayan bi tevahî ji ser wê, lewra jî ew di vê rêyê de dimeşe,” û destnîşan kir ku piranîya endamên Kongreyê yên ku roja Duşemê bi wan re civîya, piştgirîya rakirina cezayan dikin.
Serok El-Şeri’ di berdewamîya axaftina xwe de got: “Rêveberîya Amerîkî li ser wê yekê li hev kiriye ku Sûrîye hêja ye ku derfetek ji bo aramîyê, avakirina aborîya xwe û parastina yekîtîya axa xwe pê were dayîn.”
Serok El-Şeri’ danûstandinên ewlehîyê bi Îsraîlê re wekî “zehmet” lê domdar bi piştgirîya Amerîkayê û alîyên din ên navneteweyî bi nav kir û got: “Şertên her peymaneke paşerojê dê ji Îsraîlê bixwazin ku vekişe cihên ku berî hilweşîna rejîma Esed di 8ê Kanûna Pêşîn a borî de dagir kiribûn, û ez bawer dikim ku Amerîka yekane welatê cîhanê ye ku dikare reftara Îsraîlê kontrol bike.”
Serok El-Şeri’ duh li Koşka Spî bi Serok Trump re civîya. Her du alîyan rêyên xurtkirina têkilîyên dualî, pêşvebirina hevkarîyê di warên cuda de û gengeşekirina çend mijarên herêmî û navneteweyî yên girîng gotûbêj kirin.
