Rîyad-SANA
Wezîrê Ragihandinê Xalid Ze’rûr, di serdana xwe de ku duh Yekşemê bo baregeha Ajansa Nûçeyan a Siûdî “SPA” li Rîyadê pêk anî, ligel Serokê Birêveber ê Ajansê Hesen bin Mihemed El-Esmerî, awayên bihêzkirina hevkarîya di warê nûçeyan de û pevguhertina ezmûnên pîşeyî di navbera Ajansa Nûçeyan a Erebî ya Sûrî ya “SANA” û “SPA”yê de, her wiha pêşxistina xebata ragihandinê bi awayekî ku li gorî guherînên bilez ên di vê qadê de be, gotûbêj kirin.
Di hevdîtinê de, mekanîzmayên pêşxistina binesazîya medyayî, xurtkirina şîyana sazîyên ragihandinê di rûbirûbûna kêşeyên belavbûna agahîyên şaş û gotegotan de, tevî gotûbêjkirina qadên birêveberîyê û pêşxistina sektora medyayê, ligel sûdwergirtina ji ezmûn û tecrûbeyên li ba her du alîyan bi liberçavgirtina taybetmendîya her ezmûnekê, hatin nirxandin.
Her du alîyan li ser bihêzkirina şîyanên kadroyên medyayî bi rêya çalakkirina bernameyên perwerdeyê yên taybetmend ku ji hêla “Akademîya SPA”yê ya bo Perwerdeya Nûçegihanîyê ve têne pêşkêşkirin li hev kir; ajansê amadebûna xwe ji bo dabînkirina piştevanîya rahênanê û sûdwergirtina ji şîyana navenda xwe ya pispor nîşan da, bi awayekî ku beşdarîyê di pêşxistina karînên xebatkarên qada nûçeyan de bike.
Her wiha her du alîyan rêyên nûjenkirina pergalên nûçe û zanyaran û geşedana şîyanên tîmên kar gotûbêj kirin, bi awayekî ku pêdivîyên sazîyên medyayî yên her du welatan dabîn bike û rê li ber hevkarîyeke zêdetir ligel ajansên nûçeyan ên herêmî û navneteweyî veke.
Wezîr Ze’rûr û şandeya pê re ku Rêveberê Giştî yê Ajansa Erebî ya Sûrî ya Nûçeyan Zîyad El-Mehamîd jî di nav de bû, di gerekê de li beşên “SPA”yê, li mekanîzmayên xebata edîtorî û sîstema hevahengî û weşandinê bi rêya platformên cihêreng, nexasim ragihandina dîjîtal, tevî ezmûna ajansê di hilberîna naveroka pirzimanî û rûmalkirinên taybetmend de û destpêşxerîyên wê yên di qada ragihandina elektronîk dê, nihêrî.
Her wiha şandeyê li “Akademya SPA”yê li bernameyên wê yên perwerdeyê û holên wê yên ku bi teknolojîyên herî nûjen hatine amadekirin nihêrî, û li ser plana wê ya bernameyên kurt ên rahênanê bo sala 2026an û hevkarîyên wê yên bi zanîngehan re ji bo amadekirina derçûyan û hevahengkirina şîyanên wan ligel pêdivîyên bazara kar, agahdar bû.
Di dawîya serdanê de, Ajansa Nûçeyan a Siûdî weku pêzanîn ji bo serdana wî û xurtkirina hevkarîya medyayî ya di navbera her du alîyan de, mertaleke rêzlêgirtinê pêşkêşî Wezîrê Ragihandinê kir.
