Cinêv-SANA
Sûrîyê tekez kir ku pabendbûna wê bi dozên mafên mirovan pabendbûneke niştimanî ya resen û dîrokî ye, ku ji wijdana giştî û ezmûna tal a ku di şêst salên borî de tê re derbas bûye, tê.
Serokê şanda Sûrîyê di daxuyanîyekê de di civîna Encumena Mafên Mirovan de li Cinêvê duh Çarşemê got: “Berî salekê, Wezîrê Derve û Koçberan Es’ed Hesen El-Şeybanî li pêşîya serokatîya encumenê cara yekem axivî, wek nûnerê gelê ku nû ji yek ji hovtirîn rejîmên zordar di dîroka me ya hevdem de rizgar bûye.”
Peywendîya Sûrîyê ligel Encumenê
Serokê şandê dîyar kir ku Sûrîye tekez dike ku peywendîya wê bi encumenê re peywendîyeke sazûmanî ye ku li ser bingeha dîyaloga pratîk û hevkarîya teknîkî hatîye avakirin, bi awayekî ku rêzê li serwerîya niştimanî bigire û parastina mafan li ser erdê bike.
Bihêzkirina serwerîya yasayê
Serokê şandê di daxuyanîya xwe de amaje pê kir ku bi hilweşîna rejîma Esed re, Sûrîyê dest bi avakirina dewleta yasa û sazîyan kir, ku tê de rêkarên dadwerî û sazûmanî ji bo bihêzkirina serwerîya yasayê hatine pejirandin, bi awayekî ku layiqî qurbanîyên gelê Sûrîyê be û mafên wan biparêze.
Hevkarîya bi Rêxistina Qedexekirina Çekên Kîmyewî re
Serokê şandê da zanîn ku hevkarîya Sûrîyê bi Rêxistina Qedexekirina Çekên Kîmyewî re ji şêweyê sembolîk derbasî pevguhertina tam a agahîyan bûye, ku cara yekem li Sûrîyê bi hevkarîya komîsyarê Roja Cîhanî ya Mafên Mirovan hat pîrozkirin.
Çesipandina lêpirsîna niştimanî li gorî yasayê
Serokê şanda Sûrîyê di daxuyanîya xwe de got: “Danezana Destûrî qedexekirina îşkence, windakirina bi kotekî û dadgehên awarte dîyar kirîye, û tekezî li ser serxwebûna dadwerîyê kirîye.”
Pirrengî hêmana hêz û dewlemendîya niştimanî ye
Serokê şandê her wiha got: Di destpêka îsal de, di qonaxeke dîrokî ya girîng de, birêz Serok Şeri’ mersûma hejmar 13 ya sala 2026an derxist, ku tê de mafên çandî û zimanî yên Kurdên Sûrîyê hatin naskirin, û prensîba hevwelatîya wekhev bêyî ti cudahîyeke li ser bingeha nijad, ol an ziman hat çespandin.
Mafên jin û zarokan
Derbarê mafên jinan, serokê şandê tekezî li ser pabendîyên navdewletî yên Sûrîyê kir, di nav de peymana jinavbirina her cure cudahîyên li dijî jinan (CEDAW), û karkirina li ser entegrekirina dozên jinan di bernameyên başbûnê de û bihêzkirina jinan di warê aborî de, her wiha di mafên zarokan de.
Sepandina serwerîya dewletê
Serokê şandê tekez kir ku ev hemû rêkar ligel hewldana me ya ji bo yekkirina sazîyan û sepandina serwerîya dewletê bûn, lewra em gihîştin hevtêgihîştinên aştîyane ji bo agirbesteke giştî, û yekkirina sazîyên giştî li Hesekê di nav movikên dewletê de.
Bûyerên Perav û Siweydayê
Serokê şanda Sûrîyê got: Em li vir bi dilsozî, şefafî û berpirsyarîyê disekinin daku behsa astengî û kêşeyan jî bikin. Li herêmên Peravê û piştre li Siweydayê di sala borî de bûyerên bi êş rû dan ku tê de qurbanîyên bêguneh ketin, û em wek her wijdana mirovî ya zindî, wan rewa nabînin û qebûl nakin.
Operasyona Heleb û Cizîra Sûrîyê
Wî dîyar kir ku ya herî girîng ew e ku em ji bertekan derbasî fêrbûn û pêşxistina nêzîkatiyan bûn. Di operasyonên vê dawîyê yên Heleb û Cizîra Sûrîyê de, hêzên hikûmetê li gorî planeke meydanî ku ders ji ezmûnan wergirtibûn, ketin hundir.
Avakirina dewletê ji kavilên pênc dehsalîyan
Serokê şandê got: Rewş wek hûn dizanin bi ti awayî ne îdeal e, em dewleta xwe ji kavilên pênc dehsalan ji desthilatdarîya totalîter ava dikin, ku dewlet ji naveroka wê vala kiribû û tirs, lîstika tayifgerî û bêcezabûna sazûmanî kiribûn stûnên desthilatdarîya xwe.
Berdewamîya binpêkirinên Îsraîlê
Serokê şandê di daxuyanîya xwe de bal kişand ser binpêkirinên berdewam ên Îsraîlê li dijî serwerîya Sûrîyê û êrîşên wê yên dubare li ser xaka Sûrîyê ku piştî hilweşîna rejîmê jî nesekinîne.
Pabendbûna bi mafên mirovan
Her wisa got: Em pabendbûna xwe bi mafên mirovan wekî pesneke dîplomatîk an beşdarîyeke protokolî nabînin, lê belê wekî pabendîyeke niştimanî ya resen û dîrokî dibînin ku ji wijdana me yê giştî û ezmûna me ya tal dertê holê.
