New York-SANA
Neteweyên Yekbûyî
Komeleya Giştî ya Neteweyên Yekbûyî (NY) berbanga îro biryarek pejirand ku berdewamîya dagirkerîya Îsraîlê û pêvekirina Colana Sûrîyê wekî neqanûnî dibîne, û daxwaza vekişîna heta hêla 4ê Hezîrana 1967an ji Îsraîlê dike.
123 welatan dengê erê dan proje-biryara ku ji alîyê Misirê ve hatibû pêşkêşkirin, Îsraîl û 6 welat li dijî wê derketin, û 41 welat jî bêalî man.
Biryar destnîşan dike ku biryara Îsraîlê ya di 14ê Kanûna Pêşîn a 1981ê de ya ferzkirina qanûn, daraz û rêveberîya xwe li ser Colana Sûrîyê ya dagirkirî, betal û pûç e û tu rewatîya wê nîne.
Nûnerê Daîmî yê Sûrîyê li NY Îbrahîm Ulebî di daxuyanîyekê de ji kanala El-Ixbarîye re got: Komeleya Giştî di dema dengdana li ser proje-biryara têkildarî Colana Sûrîyê ya dagirkirî de şahidîya bûyereke girîng kir, ku yekem car e 123 welat piştgirîyê didinê.
Ulebî wiha pê de çû: “Ev dengdan û biryara navneteweyî nîşan didin ku Sûrîye, tevî hemû keleman, dev ji mafê xwe yê li Colanê bernade, û ev yek bi rêya hêza xwe ya dîplomatîk a nû û tevlîbûna çalak a bi civaka navneteweyî re piştrast kiriye, ku bûye sedema guhertina helwesta zêdetirî 26 welatan li gorî sala borî di berjewendîya biryarê de.”
Ulebî rola Misirê ku bi salan e vê biryarê pêşkêş dike bilind nirxand, di heman demê de pesnê rola wan hemû welatan da ku bi salan e bi erê dengê xwe danê û yên ku îsal bi erê dengê xwe danê.
Nûnerê Daîmî yê Sûrîyê li NY tekez kir ku danûstandinên bi Îsraîlê re bi tu awayî mijara çarenivîsa Colana Sûrîyê ya dagirkirî li xwe nagirin, û ew axeke Erebî ya Sûrîyê ye û helwesta Sûrîyê li hember vê dozê neguhêr e.
Her wiha amaje bi wê yekê kir ku danûstandinên ku di navbera Sûrîye û Îsraîlê de bi çavdêrîya Serokê Amerîkayê Donald Trump pêk hatin, ew jî di çarçoveya hewldanên çareserkirina nîgernaîyên ewlekarîyê yên her du alîyan.
