New York – SANA
Nûnerên welatên endam ên Encumena Asayîşê ya Navdewletî tekezî li ser pêwîstîya piştgirîya proseya sîyasî li Sûrîyê kirin. Her wisa doza rakirina cezayên li ser wê, piştevanîya hewldanên dijî terorê, lezkirina vegera penaberên Sûrî û rawestandina êrîşên dubare yên Îsraîlê kirin.
Di heman rûniştinê de, pêşwazî li peymana di navbera hikûmetê û “HSD”ê de kirin derbarê tevlêkirina HSDê di nav sazîyên dewleta Sûrîyê de. Ev pêngav mîna geşedaneke pêwîst ji bo parastina yekîtîya Sûrîyê û rêzgirtina li yekparçebûna axa wê hate nirxandin.
Di civîna ku Encumena Asayîşê duh derbarê rewşa Sûrîyê de li dar xist, endamên encumenê tekezî li ser pêwîstîya hevparîyeke rasteqîn bi Hikûmeta Sûrîyê re ji bo pêkanîna aramîyeke mayînde li Sûrîyê û herêmê kirin. Wan destnîşan kir ku hilbijartinên dawî yên Encumena Gel vîna gelê Sûrîyê ya ji bo vegerandina sazîyên dewletê û xurtkirina serwerîya niştimanî nîşan dide.
Di axaftina xwe ya di civînê de, Nûnerê Herdemî yê Sûrîyê li Neteweyên Yekbûyî, Îbrahîm Ulebî, piştrast kir ku hefteya astbilind a dawî li Neteweyên Yekbûyî (NY) qonaxeke girîng bû di vegera bihêz a Sûrîyê bo rêxistina navneteweyî. Her wiha got ku hilbijartinên dawî yên Encumena Gel piştî bi dehên salan cara yekemîn derfeteke sîyasî ya rasteqîn ji bo Sûrîyan pêk anî.
Ulebî da zanîn ku Hikûmeta Sûrîyê pabendîyên xwe yên li parêzgeha Siwêdayê didomîne, û hewldanên hikûmetê di têkoşîna li dijî belaya madeyên hişbir de berdewam in. Sûrîye hevkarîya xwe ya navdewletî û herêmî di şerê li dijî terorê de jî dom dike. Wî her wiha eşkere kir ku zêdetirî milyonek penaber vegerîyane Sûrîyê û divê êrîşên Îsraîlê yên ku aramîyê li herêmê têk didin, bên bidawîkirin.
Ji alîyê xwe ve, Cîgira Nûnerê Taybet ê NY ji bo Sûrîyê, Necat Ruşdî, bal kişand ser girîngîya avakirina sazîyên nû di qonaxa veguhêz de. Necatê bang li civaka navdewletî jî kir ku cezayan rakin û parastina mafên jinan û hemû pêkhateyên Sûrîyê misoger bikin.
