Waşington – SANA
Kompanya “ElevenLabs” a Amerîkî, ku di warê teknolojîyên hişê çêkirî yê dengî de pispor e, sepaneke nû bi navê “ElevenAI” ragihand.
Ev sepan amûrên tomarkirina notên civînan, veguherandina axaftinê bo nivîsê û nivîsandina bi deng, ligel nûnerên hişê çêkirî yên ku dikarin erkên şopandinê pêk bînin, berhev dike, da ku karê hevbeş hêsan bike û berhemdarîya sazîyan xurt bike.
Malpera teknolojîyê ya “TechCrunch”ê pêr ragihand ku ev sepan derfetê dide ku civîn bên tomarkirin û notên wan bên nivîsandin, ligel agahdarkirina beşdaran derbarê tomarkirinê.
Her wisa rê dide lêgerîna di naveroka civînên berê de û vegerandina zanyarî û hûrgilîyên ku hatine gotûbêjkirin, tevî pêşkêşkirina alîkarîyê di dema axaftinan de.
Her wiha sepan rê dide ku nûnerên hişê çêkirî bên tevlîkirin da ku li ser bingeha naveroka civînan erkan pêk bînin, wekî amadekirina reşnivîsên nameyan û şopandina rêkar û erkên ku beşdar li ser wan li hev dikin.
Ev yek jî dibe alîkar ku gengeşe veguherin pêngavên kar ên ku dikarin bên cîbicîkirin.
Sepana “ElevenAI” amûreke nivîsandina bi deng li xwe digire ku axaftinê rasterast di nav sepanên cuda de vediguherîne nivîseke sererastkirî û piştgirîyê dide zêdetirî 90 zimanan.
Her wiha şîyana wê heye têgehên taybetmend ên ku di warên pîşeyî de tên bikaranîn binase.