Waşington-SANA
Lêkolîneke ku ji alîyê lêkolînerên Zanîngeha Binghamton a Amerîkî ve hatiye kirin, nîşan da ku dibe hin guhertinên têkildarî bîrdankê ne tenê di qonaxên pîrbûnê de, lê di nîvê temenî de dest pê bikin. Wê amaje bi wê yekê kir ku dibe devera “Hîpokampus a mêjî”, a berpirsa sereke ya bîrdankê, ji wê yekê zûtir ku dihate fikirîn, dest bi guhertinê bike.
Duh Çarşemê, Malpera “SciTechDaily” ya zanistî destnîşan kir ku lêkolîneran li ser nêzî 60 kesî ku temenê wan di navbera 18 û 74 salî de ne, lêkolîn kirine, tê de ji beşdaran hat xwestin ku li rûyên girêdayî hin tişt an dîmenên cihêreng binêrin, paşê piştî çend deqeyan ji wan hate xwestin ku wî tişt an dîmenê ku bi her rûyekî ve girêdayî ye, dîyar bikin, hevdemî vê yekê, lêkolîneran bi bikaranîna Wênekêşîya bi Vedenga Manyetîk (MRI) çavdêrîya çalakîya “Hîpokampusê” kir.
Encaman nîşan da ku kesên di nîvê temenî de û kesên pîr û kal bêtir rûbirûyî tevlihevkirina hûrgilîyên bîranînan dibin; dibe ku mirov wêne an dîmen bi awayekî rast bi bîr bîne, lê bi rûyê xelet ve girê bide. Tiştê balkêş ew e ku xeletîyên bîrdankê li cem kesên kal û pîr ne bi lawazbûna çalakîya “Hîpokampusê” ve girêdayî bûn, lê belê bi wê yekê ve girêdayî bûn ka çiqas dikarin şêwazên bîrdanka resen ji nû ve, bi hêz çalak bikin.
