Sucre – SANA
Tîmek ji paleontologan (zanyarên fosîlan) yek ji mezintirîn vedîtinên di warê şûnpêyên dînasoran de aşkere kirin. Ev yek piştî belgekirina hejmareke rekor a şûnpêyên van bûneweran li ser dirêjahîya peraveke jeolojîk a kevn li Bolîvyayê pêk hat. Ev agahî li gorî lêkolîneke nû ya ku ji hêla lêkolînerên Enstîtuya Lêkolînên Zanistên Erdê li Californyayê ve, bi serkêşêya zanyar Raul Esperante, hatiye kirin.
Hejmara şûnpêyên belgekirî gihîşt nêzî 16 hezar şûnpêyan ku yên dînasorên ji cûreyê “Theropoda” (Têropoda) yên sê-tilî ne. Ev şûnpê li ser neh cihan li herêma “Carreras Pampa”yê ya di nava Parka Neteweyî ya Torotoro li naverasta welêt belav bûne.
Lêkolîna ku di kovara zanistî ya PLOS Biology de -ku yek ji kovarên pêşeng ên warên bîyolojî û zanistên jînwarî ye- hate weşandin, destnîşan kir ku tîma lêkolînê daneyên hûrbîn ji 1275 şûnpêyan berhev kirine. Ev dane hatin ravekirin da ku têgihiştineke rasttir derbarê mezinahî û tevgerên dînasoran de ava bikin, zivirîn, kêşana dûv û tevgerên ku tê texmînkirin dişibin tevgerên avjenîya jî di nav de.
Lêkolînê da xuyakirin ku pîvanên şûnpêyan di navbera kêmtirî 10 santîmetreyan û zêdetirî 30 santîmetreyan de bûn. Li gorî lêkolîneran, ev yek nîşaneya cihêrengîya cureyên ku li herêmê jîyane û di serdemên cuda de di wir re derbas bûne.
Vedîtinên bi vî rengî dibin alîkar ji bo ronîkirina girîngîya jeolojîk û jînwarî ya herêmê, ku hêj gelek razan vedişêre û li benda aşkerekirinê ne.
