Seul-SANA
Kompanya Elektronîk a Samsungê îro telefona xwe ya nû “Galaxy Z Tri-Fold”, ku yekem telefona zîrek a sêqatî ye, eşkere kir. Ev gav bi armanca bihêzkirina amadebûna Samsungê di bazara amûrên tên tewandin de tê avêtin, ku hevrikîyeke dijwar bi şirketên Çînî re tê de heye.
Li gorî malpera Sky Newsê, telefon dikare were vekirin da ku bigihîje ekraneke bi mezinahîya 10 înçan ku ji sê panelan pêk tê; ango bi rêjeya ji sedî 25 ji ekrana modelên herî dawî yên Samsungê yên tên tewandin mezintir e.
Cîgirê Serokê Cîbicîkar ê Firotin û Bazarsazîyê li Koreyê Alex Lim got: Bazara amûrên ku tên tewandin “dê mezinbûnê bidomîne”. Lim tekez kir ku dîzayna telefona nû dibe ku bibe “handerek ji bo berfirehbûneke mezintir di vê sektorê de”, tevî arîşeyên hilberînê û bilindbûna nirxê pêkhateyan.
Ev amûr dê di 12ê Kanûna Pêşîn de li Koreya Başûr were pêşkêşkirin. Tê çaverêkirin ku berî dawîya îsal (2025) bigihîje Çîn, Sîngapûr, Taywan û Îmaratê. Her wiha tê pêşbînîkirin ku di çaryeka yekem a sala bê (2026) de li Amerîkayê jî were destpêkirin.
