Şam – SANA
Îro Duşemê, kar û xebatên Dîdara Veberhênanî û Bazirganî ya Çandinîyê ji bo zincîrên nirxan ên kelûpelên xwedî pêşgavî li Sûrîyê dest pê kir.
Dîdar ji alîyê Rêxistina Erebî ya Geşepêdana Çandinîyê û Sazîya Navdewletî ya Îslamî ji bo Fînansekirina Bazirganîyê ve, û bi hevkarîya ligel Wezareta Çandinîyê, li Otêla “Qeyser Palas”ê li Şamê tê organîzekirin.
Dîdara ku hejmarek pisporên karûbarên çandinîyê ji her du sektorên giştî û taybet tê de beşdar in, pirsên veberhênana çandinîyê û ewlehîya xurekê, astengî, derfet û asoyên hevkarîyê gotûbêj dike.
Her wiha derfetên veberhênanê yên hêvîkirî û zincîrên nirxê çandinîyê yên xwedî pêşgavî li Sûrîyê pêşan dide, li kêleka wê jî mekanîzmayên fînansekirina çandinîyê û birêvebirina metirsîyan, û rola çandinîya girêbestî di piştgirîkirina sektora çandinîyê û xurtkirina berdewamîya wê de gengeşe dike.
Derbaskirina çarçoveyên hilberînê yên klasîk
Alîkarê Wezîrê Çandinîyê yê Karûbarên Sîyaset û Geşepêdana Gundewarî, Mihemed Yûsif El-Miqdad, dema despêkirina Dîdarê, di gotara xwe de dîyar kir ku veberhênana çandinîyê û ewlehîya xurekê pêdivî bi veguhestina ji çarçoveyên hilberînê yên klasîk ber bi hevpişkîyên veberhênanî yên rastîn ve hene ku hilberînê bi xizmetên lojîstîk, embarkirin û duristkirinê ve girê bide; ew jî di nava zincîrine nirxan ên nerm û tevgir de ku şîyana wan a xweragirîya li hemberî kelem û astengîyan hebe.
Her wiha El-Miqdad bal kişande ser wê yekê ku Wezareta Çandinîyê ji bo sazkirina nêrîneke stratejîk kar dike ku nexşeyeke veberhênanê ya li ser parêzgehan dabeşkirî dihewîne; ev nerîna stratejîk derfetên veberhênanê yên berdest, astengîyên ku rastî wan tên û rêbazên çareserkirina wan destnîşan dike.
Wekî din, dîyar kir ku veberhênana çandinîyê ne tenê bi dabînkirina sermayeyê ve sînorkirî ye, lê belê li ser hevpişkîyeke rastîn di navbera sazîyên hikûmî, sektora taybet û rêxistinên geşepêdanê yên xwecihî û navdewletî de tê avakirin.
