Hims – SANA
Kadroyên teknîkî û endezyarî li Wêstgeha Hilberîna Elektrîkê ya Cenderê, îro Yekşemê, bi armanca baştirkirina karîgerîya hilberînê û bilindkirina amadebaşîya amûran ji bo vegera li xizmetê, xurtkirina pêbawerîya wan û kêmkirina rawestandinên awarte, dest bi kar û xebatên çaksazkirina perîyodîk a koma gazê ya çaremîn kir ku ew jî hevdemî çaksazkirina qazana çaremîn tên.
Rêveberê Wêstgehê, Endezyar Ehmed El-Rec, di daxuyanîyekê de ji SANAyê re, dîyar kir ku ji bo piştrastkirina ewlehîya wan û dîyarkirina pêdivîyên wan ji çaksazkirinê yan guhartinê, xebatên çaksazîyê, pişkinîna beşên germ di koma gazê de, bi taybetî şewatxane, rêgehên gazê û şifreyên rêza yekem ên westar û bitevger vedihewînin; bi awayekî ku di vegerandina karîgerî û berhemanîna wan a dîzaynî de bibe alîkar.
Şîyana hilberînê
El-Rec dîyar kir ku şîyana turbîna gazê nêzîkî 90 megawatî ye, di heman demê de şîyana koma hilmdar a girêdayî wê nêzîkî 45 megawatî ye; bi vî rengî encama giştî digihîje derdora 135 megawatî.
Her wiha dîyar kir ku ji ber berdewamîya xebata komên hilberînê yên din, li gorî hemahengîya xebitandinê û qaseyên gazê yên berdest, xebatên çaksazîkirinê bandor li hilberîna elektrîkê nekir.
