Reqa-SANA
Rêveberîya Xanûberan li Parêzgeha Reqayê, ji dema destpêkirina xebatên xwe ve di Tîrmeha borî de, hewldanên xwe didomîne da ku xizmetguzarîyên ku ji welatîyan re tên pêşkêşkirin, bi pêş bixe û têkelbûn û tevlîhevîya daxwazname û dosyeyên eqarî yên di dema rawestana xebatê de ji sala 2013an ve çêbûne, çareser bike; ev yek jî bi xurtkirina kadroyên mirovî, îmkanên teknîkî û nûjenkirina mekanîzmayên xebatê pêk tê, bi awayekî ku alîkarîya lezkirina rêkaran û parastina mafên xwedîtîyê bike.
Jinûvekarkirin û pêkanîna pêdivîyên gel
Rêveberê Xanûberan li Parêzgeha Reqayê Ebdilah El-Selcî di daxuyanîyekê de ji bo SANAyê îro Duşemê dîyar kir ku piştî rizgarkirinê, rêveberîyê dest bi pêşwazîkirina welatîyan û pêşkêşkirina xizmetên eqarî yên bingehîn kiriye; ev yek jî, di çarçoveya planekê de tê ji bo jinûveçalakkirina xebatê û pêkanîna pêdivîyên gel piştî çend salên qutbûnê.
El-Selcî da xuyakirin ku xizmetguzarîyên berdest ev in:
- Derxistina daneyên qeyda eqarî û senedên xwedîtîyê.
- Amadekirina dane û nexşeyên pîvangerîyê û daneyên cih û sînoran.
- Şopandina daxwaznameyên veguhastinê, firotinên vebirî/ bêşert, dabeşkirin û daxwaznameyên din ên qanûnî yên bi eqaran ve girêdayî ne.
Navbor axaftina xwe dewam kir û da zanîn ku rawestana xebatê ji sala 2013an ve bûye sedema kombûneke mezin a daxwazname û dosyeyan, ku vê yekê jî, ji piştî destpêkirina xebatê ve, zexteke zêde xiste ser milê kadroyan.
Her wiha dîyar kir ku nebûna xizmetên eqarî yên fermî di wan salan de hişt ku hin welatî karên firotin û kirînê li derveyî qeydên fermî û eqarî pêk bînin, vê rewşê jî hinek ji wan xistin ber xetereyên şantaj, xapandin û windabûna mafan.
