Şam-SANA
120 endamên Polîsên Geştyarîyê, ku li ser dergeh, beş û qadên Pêşangeha Navneteweyî ya Şamê (gera 63yem) hatine belavkirin, bi zêdetirî deh zimanan xizmetên ewlehî û rênîşandanê pêşkêşî serdanker û şandeyên bîyanî dikin.
Ew jêhatîbûna xwe ya zimanan ji bo hêsankirina pêwendîkarîyê bi kar tînin, bi taybetî ji ber beşdarîya navneteweyî ya berfireh û hatina zêde ya xelkê.
Polîsên geştyarîyê karên birêvebirina serdankeran û rênîşandana wan ber bi beş û çalakîyên cuda ve dimeşînin; her wiha bi hevahengîya jûra operasyonan û alîyên pêwendîdar, di rewşên lezgîn de destwerdanên pêwîst dikin.
Zimanê serdankeran.. pareke xizmetguzarîyê ye
Polîsê Geştyarîyê Ebdilrezaq Bekir ku bi zimanê Almanî diaxive, di daxuyanîyekê de ji SANAyê re dîyar kir ku zanîna çend zimanan dibe alîkar ku astengîyên têkilîdanîna bi serdankeran re ji kêlîya gihîştina wan ve werin rakirin, xasma ji bo şandeyên Almanyayê û malbatên Sûrî yên li wir akincî ne.
Ziman wekî amûra birêvebirina rewşên awarte
Giringîya jêhatîbûna zimanan tenê bi pêşkêşkirina agahî û rênîşandanan sînordar nabe, belkî di birêvebirina wan rewşan de ku pêdivîya wan bi têkilîdanîneke rasterast û bilez heye jî roleke sereke lîstiye.
Polîsê Geştyarîyê Mecid El-Cewherî ku bi zimanê Çînî dipeyive, got: “Endam li ser dergehan û di nav beşên pêşangehê de amade ne da ku rênîşandanên pêwîst bidin serdankeran û di rewşên mirovî yên wekî windabûna zarokan de alîkarîyê bikin.”
Rola polîsên jin di xizmetkirina serdankerên jin de
Polîsên jin ên geştyarîyê jî di cîbicîkirina erkên ewlehî û xizmetguzarîyê de beşdar in, nemaze di warên girêdayî serdankerên jin, wekî pişkinîna ewlehîyê, rênîşandan û alîkarîyê.
Endama Polîsên Jin a Geştyarîyê Cînan Celal Hemûd bi zimanê Rûsî diaxive, eşkere kir ku xebata endamên jin alîyên ewlehî û xizmetguzarîyê li xwe digire; zanîna zimanan jî rê dide ku ew bi awayekî rasterast bi serdanker û şandeyên bîyanî re têkevin têkilîyê.
Şopandina pêdivîyên serdankeran
Ji alîyê xwe ve, Polîsê Geştyarîyê Eyûb Fide ku bi zimanê Aramî diaxive, da zanîn ku erkên wî li Bajarê Pêşangehan parastin, rênîşandan û alîkarîya zîyaretkaran e.
Fide destnîşan kir ku zanîna wî ya zimanê Aramî hêsankarîyê dike ku ew bi wan serdankerên ku bi vî zimanî diaxivin re pêwendîyê deyne.
Belavbûna polîsên geştyarîyê di çarçoveya planeke ewlehî û rêkxistinî ya giştî de tê ku ji bo Pêşangeha Navneteweyî ya Şamê hatiye amadekirin.
Ev plan bi hevahengîya di navbera alîyên pêwendîdar û wezaretên Navxwe û Geştyarîyê de pêk tê, da ku ewlehîya pêşangehê û dabînkirina xizmetguzarîyan ji bo serdankeran di heman demê de werin meşandin.
