Şam-SANA
Encumena Gel a Sûrîyê, pergala xwe ya rêxistinî bi avakirina 26 komîteyên daîmî yên pispor li gorî biryara hejmar 109 a sala 2026an kuta kir. Ev pêngav rê li ber destpêkirina xebata yasadanînê ya pispor û dabeşkirina dosyayan li ser komîteyan li gorî siruşta pisporîyên wan, vedike.
Serokê Encumena Gel Ebdilhemîd El-’Ewwag biryara hejmar 109 a sala 2026an derxist ku navandina endamên komîteyên daîmî, serok û cîgirên wan li xwe digire, piştî pejirandina rêziknameya navxweyî ya encumenê bi şêweyê wê yê dawî di 30ê Tîrmeha borî de.
Biryar nexşeyeke berfireh ji bo pisporîyên komîteyan dîyar dike, di heman demê de dosyayên ku rasterast bi pêdivîyên qonaxa veguhêz ve girêdayî ne di nav wan de derdikevin pêş, wekî dadwerîya veguhêz û aştîya civakî, karûbarên qurbanîyan û şehîdên Şoreşa Sûrîyê, jinûveavakirin, geşepêdana domdar û veguhertina dîjîtal.
26 Komîte.. Nexşeya Xebata Parlamentoyê Çi Li Xwe Digire?
Her 26 komîte warên cuda cuda yên xebata parlamentoyê li xwe digirin; ji yasadanîn û karûbarên destûrî û darayî dest pê dike, di aborî, rêveberîya xwecihî û xizmetguzarîyan re derbas dibe, heta ku digihîje ewlehî, parastin, sîyaseta derve, maf û azadîyan.
Di Nexşeya Komîteyan de Tişta Nû Çi ye?
Taybetmendîyên herî berbiçav ên nexşeya komîteyên niha di veqetandina komîteyan de ji bo dosyayên ku rasterast bi daxwazên qonaxa niha ve girêdayî ne xwe didin der ku di serî de Komîteya Dadwerîya Veguhêz û Aştîya Civakî ye; komîteya ku bi dosyayên têkildarî çareserkirina şopên serdema rejîma berê, xurtkirina aştîya civakî û piştgirîya rêyên lihevhatin û dadmendîyê re mijûl dibe.
Li kêleka wê jî Komîteya Karûbarên Qurbanîyan û Şehîdên Şoreşa Sûrîyê tê, ku pirsên qurbanîyan û mafên wan di çarçoveya xebata parlamentoyê ya pispor de bi cih dike, di çarçoveya çareserkirina mîrasa qonaxa borî û avakirina sazîyên ku bersiva van dosyayan didin.
Komîte Çawa Dibin Amûrên Xebata Yasadanînê?
Avakirina komîteyên daîmî gaveke bingehîn e ji bo birêkxistina gerîna xebata yasadanînê li hundirê Encumena Gel, ji ber ku her komîteyek lêkolîna pêşnûmeyên qanûnan û mijarên ku di çarçoveya pisporîya wê de jê re tên şandin, gotûbêjkirina wan û amadekirina pêşnîyar û raporên pêwîst li ser wan berî ku bo encumenê were pêşkêşkirin digire ser xwe.
Temambûna Pergala Encumenê Tê Çi Wateyê?
Bi temambûna avakirina komîteyên daîmî re, Encumena Gel ji temamkirina pergala xwe ya rêxistinî derbasî ezmûna şîyana xwe ya veguherandina vê sazûmanîyê bo xebateke yasadanîn û çavdêrîyê ya çalak dibe.
