Şam-SANA
Bi çavdêrîya Wezareta Derve û Koçberan, hikûmeta Komara Koreya Başûr îro Duşemê qonaxa duyemîn a destpêşxerîyên alîkarîya mirovî yên bi fînansekirina xwe li Sûrîyê, bi nirxê 18.95 mîlyon dolarên Amerîkî, di bin dirûşma “Vejandina civakan, avakirina şîyana xweragirtinê û çûyîna ber bi paşerojeke geş ve”, di ahengeke fermî de li Hotêla Golden Mezzeyê li Şamê, da destpêkirin.
Destpêkirina qonaxa duyemîn ji alîyê Koreya Başûr ve bi hevkarîya ligel Koordînatora Niştecî ya Neteweyên Yekbûyî li Sûrîyê Nathalie Fustier, Bernameya Pêşvebirinê ya Neteweyên Yekbûyî (UNDP), Rêxistina Neteweyên Yekbûyî ya Zarokan (UNICEF) û Bernameya Xurekê ya Cîhanî (WFP) pêk tê.
Li gorî daxuyanîya çapemenîyê ya hevpar a di navbera Neteweyên Yekbûyî û Komara Koreya Başûr de, ku kopîyeke wê gihîştiye SANAyê, bername sê destpêşxerîyan ji bo baştirkirina jîyana zarok, malbat û civakên herî lawaz li seranserî Sûrîyê li hev dicivîne.
Ev yek jî bi rêya berfirehkirina gihîştina bi xizmetguzarîyên bingehîn, di nav de perwerde, tenduristî, xurek û alîkarîyên xwarinê, ligel xurtkirina derfetên debarê, piştgirîya başbûna zû û avakirina şîyana xweragirtinê, pêk tê.
