Şam-SANA
Rêveberê Giştî yê Sazîya Giştî ya Pêwendîyên Rêyan li Wezareta Veguhestinê Muaz Necar eşkere kir ku îhaleya taybet bi cîbicîkirina projeyên nûjenkirina rêyên Şam – Tedmur û Tedmur – Dêrezorê û avakirina şaxê duyem ji bo wan, ji şirketa Siûdî “El-Rewaf”ê û şirketa Sûrî “El-Kewatî” re hatine spartin.
Nirxê giştî yê her du projeyan nêzîkî 300 milyon dolarên Amerîkî ye.
Ev biryar piştî pejirandina pêşnîyara herî baş ji alîyê teknîkî û aborî ve ji nav gelek pêşnîyarên ku berîya du mehan hatibûn pêşkêşkirin, hat girtin.
Necar îro Çarşemê di hevpeyvîneke taybet de ji SANAyê re dîyar kir ku dema cîbicîkirina her du projeyan 780 roj e.
Navborî anî ziman ku her du şirketan bernameyeke demî ji bo bidawîkirina karan di dema dîyarkirî de pêşkêş kiriye: “Cîbicîkirin dê piştî temambûna karûbarên pesendkirina peymanê û îmzekirina wê ji alîyê Sekreterîya Giştî ya Serokatîya Komarê (Beşa Karên Encumena Wezîran) ve dest pê bike.
Muaz Necar da zanîn ku proje nûjenkirina rêya heyî ya di navbera Şam û Tedmurê de û avakirina hêleke duyem li alîyê beramber li xwe digire.
Her wiha nûjenkirina rêya Tedmur – Dêrezorê û avakirina şaxê duyem ji bo wê jî di nav de ne.
Ev yek li gorî taybetmendîyên teknîkî yên bilind tê kirin da ku rê bibe “rêya dualî”, karîna wê ya veguhestinê zêde bibe û asta ewlehîya trafîkê xurt bibe.
Navborî li dawîyê tekez kir ku çespandina van projeyan pêngaveke bingehîn e ji bo jinûvegirêdana herêma rojhilat bi parêzgehên din ve û yekkirina wê bi tora binesazîyê û rêyên navendî re.
