Şam-SANA
Komîteya Niştimanî ya Nehiştina Qezenca Nerewa dirêjkirina mohleta sûdwergirtina ji bernameya “Eşkerekirina Xwebexş” heta dawîya meha Kanûna Paşîn a sala 2027an a bê ragihand.
Ev yek piştî civîneke serokatî û endamên komîteyê hat, ku tê de daxwazname û serlêdanên ku gihîştibûn komîteyê derbarê dayîna mohleteke zêde ji bo sûdwergirtina ji vê bernameyê hatin lêkolînkirin, bi taybetî ji bo kesên li derveyî Sûrîyê dimînin û di qonaxa borî de nekarîbûn rêkarên xwe temam bikin yan jî biryara eşkerekirinê bidin.
Ofîsa Ragihandinê di daxuyanîyeke taybet de ji bo nûçegihanê SANAyê îro Şemîyê dîyar kir ku komîteyê piştî lêkolînkirina daxwazan, xwest derfeteke zêde û dawîn bide kesên ku dixwazin rewşa xwe bi awayekî xwebexş û yasayî çareser bikin; lewma biryar da ku mohleta sûdwergirtina ji bernameya “Eşkerekirina Xwebexş” heta 31ê Kanûna Paşîn a sala 2027an li gorî pîvan û rêkarên pejirandî yên komîteyê were dirêjkirin.
Komîteyê zelal kir ku eşkerekirina xwebexş yek ji rêyên yasayî ye ku di nav sîstema karê xwe de ji bo çareserkirina mîrasa qezenca nerewa pejirandiye.
Armanca wê ew e ku derfetê bide kesên ku dixwazin rewşa xwe sererast bikin -ji wan kesên ku berê kar an berjewendîyên wan bi sembolên rejîma revîyayî yan navik û torên wê yên aborî ve girêdayî bûn- da ku rastîya rewş, saman û milkên xwe eşkere bikin, û her gava ku pîvanên pejirandinê li wan hatin sepandin, derbasî rêça lihevhatina yasayî bibin.
Komîteyê tekez kir ku malpera wê ya fermî ya elektronîk, torên peywendîyê û hejmarên têkilîyê yên taybet, amade ne ji bo pêşkêşkirina daxuyanî, pirsyar û gilîyan ji hundir û derveyî Sûrîyê:
www.igcc.gov.sy
