Şam-SANA
Rêveberîya Hevkarîya Navdewletî li Wezareta Derve û Koçberan komxebateke şêwirdarîyê di navbera alîyên niştimanî yên Sûrîyê û hevkarên geşepêdanê yên Almanyayê de li dar xist. Hevkarên Alman ev bûn: Banka Geşepêdanê ya Almanyayê (KfW), Ajansa Almanyayê ya Hevkarîya Navdewletî (GIZ) û Wezareta Federal a Almanyayê ya Hevkarîya Aborî û Geşepêdanê (BMZ). Civîn li otêla Dama Rose li Şamê hat sazkirin.
Armanca vê komxebatê xurtkirina hevkarî û hevahengîya di navbera sazîyên niştimanî yên Sûrîyê û hevkarên Alman de ye. Her wisa ji bo dîyarkirina pêşgavî û bernameyên hevkarîyê yên siberojê ye ku piştgirîya başbûn û geşepêdana berdewam dikin, bi awayekî ku bi pêşgavîyên niştimanî re li hev bike û ast û bandora destwerdanên geşepêdanê zêde bike.
Rêveberê Rêveberîya Hevkarîya Navdewletî li Wezareta Derve Quteybe Qadîş got: “Ev komxebat di qonaxeke wisa de tê ku pêwîst e em ji lojîka bersivdana perçebûyî derbasî lojîka başbûna birêkûpêk bibin, û ji lîsteyên pêdivîyan ên berfireh ber bi bernameyên hevgirtî ve biçin. Divê em ji destpêşxerîyên cuda derbasî rêyên hevkarîyê bibin ku pêşgavîyên niştimanî yên zelal wan birêve dibin û ji alîyê sazîyên niştimanî yên şîyandar ve têne cîbicîkirin.”
