Şam-SANA
Sendîkaya Parêzerên Sûrî tekez kir ku hebûna parêzerekî ji bo tometbaran di dozên tawankarîyê de garantîyeke qanûnî ya bingehîn e. Sendîkayê destnîşan kir ku her dadgehkirineke li pêşîya Dadgeha Tawanan ku parêzer lê amade nebe, wekî dadgehkirineke kêm tê hesibandin û dikare were betalkirin.
Sendîkayê di daxuyanîyekê de ku ajansa SANAyê duh Pêncşemê kopîyek jê wergirt, dîyar kir ku hebûna parêzer – çi yê ku bersûc bi xwe girtibe çi jî yê ku ji alîyê dadgehê ve hatibe erkdarkirin – nayê wateya parastina tawanê yan rewakirina wê. Armanc ji vê yekê ew e ku biryara dadwerî ji îtîrazan were parastin û misogerkirina derçûna biryarê bi rêkarên qanûnî yên rast e.
Sendîkayê bal kişand ser wê yekê ku peywira parêzerê erkdarkirî tenê di çarçoveya misogerkirina mafên parastinê û rêkarên qanûnî de ye, ne ku girtina ser xwe ya kiryarên bersûc. Her wiha tekez kir ku dadmendîya rastîn ne li ser bingeha bertekan, lê li ser bingeha rêkarên dirust tê avakirin, da ku nehiştina filitîna tawankaran ji cezayan were misogerkirin.
