Şam-SANA
Serokatîya Komara Sûrîyê tekez kir ku têgihiştineke hevbeş di navbera Hikûmeta Sûrîyê û Hêzên Sûrîya Demokratîk (HSD)ê de, derbarê hejmarek mijarên girêdayî paşeroja parêzgeha Hesekê, hatiye bidestxistin.
Serokatîya Sûrîyê di daxuyanîyekê de ku SANAyê kopîyek jê wergirtiye, îro Sêşemê dîyar kir ku li ser dayîna dema çar rojan ji bo HSDê hatiye lihevkirin daku şêwirê bikin ji bo danîna planeke berfireh ji bo mekanîzmaya tevlîkirina herêman bi awayekî pratîk.
Serokatîyê got: “Di dema lihevkirinê de, hêzên Sûrîyê nakevin navenda bajarên Hesekê û Qamişloyê û dê li derdora wan bimînin, li ser vê yekê ku piştre nexşerêya demî û hûrgulîyên taybet bi tevlîbûna aştîyane ya parêzgeha Hesekê, bajarê Qamişlo jî tê de, were gotubêjkirin.”
Her wiha hat tekezkirin ku hêzên serbazî yên Sûrîyê nakevin gundên Kurdan, û tu hêzên çekdar di wan gundan de bi cih nabin, tenê hêzên ewlekarîya herêmî ji xelkê herêmê li gorî rêkeftinê dê hebin.
Serokatîya Sûrîyê di daxuyanîya xwe de amaje pê kir ku birêz Mezlûm Ebdî dê berbijêrekî ji HSDê ji bo posta Alîkarê Wezîrê Parastinê pêşnîyar bike, tevî pêşnîyarkirina berbijêrekî ji bo posta parêzgarê Hesekê, û navan ji bo nûnertîya di Encumena Gel de û lîsteya kesan ji bo karkirinê di sazîyên dewleta Sûrîyê de.
Hat piştrastkirin ku herdu alîyan li ser tevlîkirina hemû hêzên serbazî û ewlekarîyê yên HSDê di nav wezaretên parastin û hundirîn de lihev kir, ligel berdewamîya danûstandinan li ser mekanîzmaya tevlîbûnê ya hûrgulî. Her wiha sazîyên sivîl jî dê di nav avahîya Hikûmeta Sûrîyê de cih bigirin.
Hat dîyarkirin ku mersûma hejmar 13 a girêdayî mafên zimanî, çandî û mafên hemwelatîbûnê yên Kurdan dê were cîbicîkirin, ev jî nîşana pabendbûna hevbeş e ji bo avakirina Sûrîyeke yekgirtî û bihêz ku li ser bingeha şirîkatîya niştimanî û garantîkirina mafên hemû pêkhateyan hatiye avakirin.
Hat destnîşankirin ku pêkanîna vê têgihiştinê dê ji saet heştê êvara îro ve dest pê bike.
