Şam-SANA
Serokê Komîsyona Bilind a Hilbijartinên Encumena Gel a Sûrîyê Mihemed Taha El-Ehmed, tekez kir ku hilbijartinên ku îro ji bo hilbijartina endamên Encumena Gel ji bo navçeyên Serê Kanîyê li parêzgeha Hesekê û Girê Spî li parêzgeha Reqayê tên lidarxistin, temamkirina qonaxa yekem a hilbijartinên ku berê hatibûn lidarxistin e.
El-Ehmed ji SANAyê re got: “Di qonaxa berê de hilbijartin li 49 navendan hatin lidarxistin, îro dê navendên mayî li Serê Kanîyê û Girê Spî bên temamkirin da ku hejmar bibe 51 navend, û hilbijartin li 9 navendên din li parêzgehên Hesekê, Reqa, Siwêda û gundewarê Helebê (navçeya Kobanîyê /Eyn El-Ereb) tên bipaşxistin.”
Navborî da zanîn ku pêşbazîya îro li ser sê kursîyên Encumena Gel e; kursîyek ji bo navçeya Serê Kanîyê û du kursî ji bo navçeya Girê Spî. Wî her wiha destnîşan kir ku çavdêr, dezgehên medyayê û Komîsyona Bilind a Hilbijartinan ji bo çavdêrîya pêvajoyê amade ne û dê encam li heman cihê jimartina dengan bên ragihandin.
El-Ehmed eşkere kir ku encamên destpêkê yên her du navçeyan (Serê Kanîyê û Girê Spî) dê îro bên ragihandin lê encamên dawî piştî lêkolîna îtîrazan tên eşkerekirin ku dibe ev yek roja Yekşemê yan Duşema bê be.
Li dawîyê jî, El-Ehmed zelal kir ku eger endamên desteyên hilbijartinê yên li Şamê dengdana xwe li navenda hilbijartinê ya li avahîya Encumena Gel berî bidawîbûna dengdanê li her du navendên hilbijartinê yên li Hesekê û Reqayê biqedînin, dê navenda li Şamê bê girtin, lê belê kaxezên dengan nayên hejmartin heta ku jimartina dengan li Girê Spî û Serê Kanîyê dest pê bike da ku jimartina dengan hevdem be.
