Şam-SANA
Wezareta Derve û Koçberan daxuyanîyek der barê “Nexşerêya Çareserkirina Krîza Siwêdayê û Aramîya Başûrê Sûrîyeyê” de weşand, ku di civîneke sêalî de li Şamê ji alîyê Wezîrê Karên Derve û Koçberan Es’ed Hesen El-Şeybanî, Wezîrê Karên Derve yê Urdunê Eymen El-Sefadî û Nûnerê Taybet ê Amerîkayê bo Sûrîyeyê Thomas Barrack, hat pejirandin.
Her weha Wezareta Derve da xuyakirin jî ku di civînê de nexşerê wekî rêya çareserkirina krîza Siwêdayê hatiye pejirandin, ew yek jî li ser bingehê yekparçeyîya xaka Sûrîyeyê û ku hemî Sûrî di maf û erkên xwe de li welatê xwe yeksan in.
Ev jî deqê “Nexşerêya Çareserkirina Krîza Siwêdayê û Aramîya Başûrê Sûrîyeyê” ye ya ku her sê welatan li hev kiriye ku hevkarîyê di pêkanîna wê de bikin:
Sûrîya, Urdun û Amerîkayê li ser “Nexşerêya Çareserkirina Krîza Siwêdayê û Aramîya Başûrê Sûrîyeyê” li hev kir û wan tekez kir ku aramîya Sûrîyeyê stûnekî aramîya herêmê ye.
Her sê welat soz didin ku bi hev re bixebitin da ku alîkarîya Sûrîyeyê bikin ku pêşerojeke aştîyane û aram ava bike. Her weha piştgirîyê bidin hewldanên jinûveavakirinê yên ku ewlehî, yekîtî û serwerîya wê diparêzin û hêvîyên gelê Sûrîyeyê pêk tînin.
Wek din jî, bi hemahengî digel hevkarên xwe, pêvajoyeke sîyasî ya berfireh a bi serokatîya Sûrîyeyê pêşve bibin da ku sazîyan ji nû ve ava bike û nûnertîya hemî Sûrîyan û wekhevîya di nav wan de li ser bingehê hemwelatîyê misoger bike.
Urdun û Amerîka dê piştgirîyê bidin hikûmeta Sûrîyeyê bo têperandina zehmetîyan, nemaze di warê jinûveavakirin, dij-terorîzm, bidawîkirina cudahîyên civakî û bidestxistina lihevhatina neteweyî.
Ev pabendbûn jî vîneke hevpar a xweragirîya di piştgirîya pêşeroja Sûrîyeyê de nîşan dide. Ji xwe Urdunê di Tîrmeh û Tebaxa 2025an de mêvandarîya civînên Emmanê kiribû û tê de ev nexşerê hatibû pejirandin.
Her sê welatan li hev kir ku ew bûyerên nexweş ên ku vê dawîyê li Siwêdayê rû dan, ji bo têperandina wan, bi hewceyî danîna rêbazeke berfireh li gorî van pernsîban e:
- Siwêda beşek ji xaka Sûrîyeyê ye û welatîyên wê di maf û erkên xwe de wek hev in.
- Têkbirina krîza bawerîya di navbera hikûmetê û parêzgehê de bi hewceyî rêbazeke hêdî ye.
- Piştî hevdîtinên Emmanê, Urdun û Amerîkayê girîngî da gav û nêrînên hikûmeta Sûrîyeyê.
Ji bo pêkanîna xalên jêrîn, her sê welatan li hev kir ku bi lez di çarçoveya parastina yekparçeyî û serwerîya Sûrîyeyê de, hevkarîyê di pêkanîna wan de bikin:
- Vexwendina Komîteyeke Serbixwe ji bo vekirina tehqîqê der barê bûyerên Siwêdayê û sizakirina berpirsyaran.
- Berdewamîya gihandina alîkarîyên mirovî û bijîşkî.
- Vegerandina xizmetguzarîyên bingehîn.
- Şandina polîsan ji bo ewlehîya li ser rê û sînoran were misogerkirin.
- Vekişîna şervanên sivîl.
- Berdana kesên girtî û revandî.
- Ji nû ve avakirina gundên zîyandar.
- Têkoşîna li dijî devjenî û gotegotan.
- Piştgirîya hewldanên lihevhatinê bi tevlêbûna hemî pêkhateyên civaka herêmî.
- Avakirina hêzeke polîsan û encûmeneke parêzgehê ku hemîyan temsîl bike.
Her weha hemî alîyan piştrast kir ku Siwêda beşekî yekgirtî yê xaka Sûrîyeyê ye û çareserî di yekîtîya neteweyî de digel danîna rêbazeke hevgirtî ji bo çavdêrîya pêkanîna nexşerêyê ye.
