Beyrût-SANA
Papa Leoyê Çardemîn bang li Libnanîyan kir ku berjewendîyên welatê xwe di ser her tiştî re bigirin û tekez kir ku Libnan mînakeke bêhempa ya aştî û lihevhatinê li herêmê pêk tîne û got ku li hember kêşeyên heyî, aştîxwaz “hêvîya paşerojê” ne.
Li gorî Ajansa Niştimanî ya Ragihandinê, Papa di gotarekê de ku li Koşka Serokatîya Libnanê pêşkêş kir, giringî da wê yekê ku divê Libnanî li ser pêşkêşkirina mînaka zindî di hevkarîya navbera pêkhateyên xwe yên cihêreng de berdewam bin û got: “Divê hûn berjewendîyên welat di ser her tiştî re bigirin, û civakeke sivîl a zindî û dewlemend bi şîyan û derfetan ava bikin, û ev yek vîneke xurt dixwaze.”
Papa pêzanînên xwe yên mezin ji bo wan Libnanîyan nîşan da ku tevî şert û mercên dijwar bi bêdengî xizmeta aştîyê dikin, û tekez kir ku aştî ne tenê rawestana nakokîyan e, lê rêbazeke berdewam a lihevhatin û karê hevbeş e, û di koka xwe de “dîyarîyeke Xwedê ye ku ji dilan diherike û ber bi yên din ve diçe.”
Papa her wiha amaje bi pêwîstîya bihêzkirina girêdanên gîyanî û dîrokî kir ku Libnanîyan bi welatê wan ve girê dide, û piştrast kir ku lihevhatina rastîn hewcedarî wêrekî, fedakarî û îradeyeke hevpar e ji bo avakirina siberojeke aramtir.
Têkildarî Doza Filistînê, Papa banga xwe ya pejirandina çareserîya du-dewletîyê nû kir, wekî rêya herî baş ji bo misogerkirina paşerojeke dadperwer hem ji bo Filistînîyan û hem jî ji bo Îsraîlîyan.
Papa Leoyê Çardemîn di serdaneke dîrokî de îro gihîştibû Beyrûtê ku dirûşma “Xwezî bi aştîxwazan” hildigire. Ev serdan qonaxeke girîng e di têkilîyên navbera Kursîyê Pêxemberî (Vatîkan) û Libnanê de, ji ber peyamên piştevanîya gîyanî û mirovî ku ji gelê Libnanê re hildigire di vê rewşa hestyar de ku Libnan tê re derbas dibe.
