Qudsa Dagirkirî – SANA
Îro, hêzên dagirker ên Îsraîlê 88 girtîyên Filistînî ji Girtîgeha Oferê li rojavayê bajarê Ramelayê, di çarçoveya qonaxa yekem a agirbestê de, berdan.
Ajansa Wefa ya Filistînî ragihand ku Xaça Sor a Navdewletî îro serê sibê wergirtina 20 dîlgirtîyên Îsraîlî li Xezeyê bi du koman piştrast kir û ew radestî desthilatdarên dagirker kirin.
Qonaxa yekem a agirbestê azadkirina 20 dîlgirtîyên Îsraîlî yên zindî yên li Xezeyê û radestkirina 28 terman li gorî pêvajoya derxistina wan ji bin kavilan, li xwe digire. Li hember vê yekê, desthilatdarîya dagirker dê 250 girtîyên Filistînî yên bi cezayê hetahetayê û 1718 girtîyên ji Xezeyê yên ku piştî 7ê Cotmeha 2023an hatibûn girtin, berde.
Serokê Amerîkayê Donald Trump, di 9ê vê mehê de, ragihandibû ku ji bo cîbicîkirina qonaxa yekem a plana xwe ya bidawîkirina şerê li Xezeyê, gihîştine peymanekê.
Li gorî sazîyên dîlgirtîyên Filistînî, hejmara girtîyan di girtîgehên dagirkerîyê de zêdetirî 11 hezarî ye ku di rewşên kambax de dijîn wekî îşkence, birçîkirin û paşguhxistina bijîjkî ya bipergal, ev yek jî bûye sedema şehîdbûna hejmarekê ji wan di zindanan de.
Di heman demê de, hejmara girtîyên ku cezayê hetahetayê li wan hatiye birîn 350 girtî ye, 40 girtî li benda heman cezayî ne. Hejmara jinên girtî 53 jin e ku sê ji wan ji Xezeyê ne û du jî zarok in. Nêzîkî 400 zarokên girtî li girtîgehên Ofer û Megiddoyê ne, hejmara girtîyên îdarî (bê darizandin) heta vê Cotmehê gihîştiye nêzîkî 3380an.
