Şam – SANA
Alîkarê Wezîrê Tenduristîyê bo Karûbarên Dermansazîyê, Hanî El-Bexdadî, tekez kir ku hilberîna xwecihî zêdetirî %80 ji pêdivîyên bazara Sûrîyê yên dermanan dabîn dike. Wî her wiha piştrast kir ku hewldanên xurtkirina vê pîşesazîyê û berfirehkirina veberhênanê, bi taybetî di warê dermanên coreyî de, tên kirin.
Alîkarê Wezîr dîyar kir ku wezaret kar ji bo van armancan dike:
- Nûjenkirina kargehên zirardîtî, dîyarkirina derfetên veberhênanê û hêsankirina rêkarên fermî.
- Pêşkêşkirina piştgirîya teknîkî û dîtina projeyên hilberîna dermanên coreyî ên ku niha tên hawirdekirin wek pêşîneyeke girîng, da ku ewlehîya dermanan bête xurtkirin.
- Pêşxistina pergala şopandinê û sazkirina desteyeke kontrolkirina dermanan li gorî pîverên navneteweyî, da ku asta kalîteya dermanan bête bilindkirin û li bazarên herêmî û navneteweyî bêne pejirandin.
El-Bexdadî destnîşan kir ku hemû kargeh di bin kontrolkirina demdemî de ne, ku pişkinîn, wergirtina nimûneyan û analîzekirina wan li gorî rêbazên navneteweyî yên dermanan li xwe digire, da ku rêkarên pîşesazkirina baş bi cih bînin.
Di çarçoveya veberhênanê de, El-Bexdadî li ser projeya karsaz Mihemed Kamil Sebax Şerbatî ya ji bo hilberîna dermanên coreyî û teknolojîyên pêşkeftî axivî, û tekez kir ku ev proje li gorî stratejîya wezaretê ya ji bo xwemalîkirina pîşesazîya dermanan e.
