Heseke – SANA
Îro Duşemê, karwanê sêyemîn ê malbatên koçberbûyî yên bajarê Serê Kanîyê û gundewarên wê ji her du bajarên Heseke û Qamişloyê ber bi cih û warên xwe ên resen ve bi rê ket; karwan nêzîkî 520 malbatan li xwe digire.
Cîgirê Parêzgarê Hesekê Ehmed El-Hîlalî di daxuyanîyekê de ji bo nûçegihanê SANAyê ragihand: “Pêvajoya birêketina malbatan demjimêr heştê sibehê dest pê kir, piştî ku hemû rêkar û amadekarî ji bo dabînkirina vegereke rêkxistî, ewle û bi rûmet ji bo xelkê ber bi malên wan ve hatin temamkirin.”
Lezkirina vegerê û valakirina dibistanan
El-Hîlalî piştrast kir ku hewldanên hikûmetê berdewam in da ku berîya hatina demsala zivistanê vegera hejmara herî zêde ya malbatan bê lezkirin; ev yek jî hevdem e bi valakirina navendên stargehên demkî û wan dibistanên ku malbat tê de diman, ji bo ku derfet bi wan bê dayîn li herêmên xwe yên resen bi cih bibin û ew dibistan jî ji nû ve ji bo xwendin û perwerdeyê bên vekirin.
Paqijkirina gundan ji bermayîyên şer
Cîgirê parêzgar destnîşan kir ku tîmên hilanîna mayînan ên rêxistinên pispor, bi hevkarîya beşê endezyarîya leşkerî ya artêşê, li ser xebatên pişkinîn û paqijkirina gund û herêmên Serê Kanîyê ji şûnmayên şer berdewam in.
Navborî her wiha da zanîn ku lîsteyên kesên vegerîyayî li gorî deverên ku bi temamî amade û ewle dibin tên amadekirin.
Ev karwan di çarçoveya bernameya “Vegera Xwebexş” de yê sêyemîn tê hesibandin; berîya vî karwanî, karwanê yekem bi tevlîbûna 413 malbatan û yê duyem jî bi tevlîbûna 700 malbatî bi rê ketibûn.
Bi vî awayî, hejmara giştî ya malbatên ku vegeriyane cîwarên xwe gihişte zêdetirî 1630 malbatî, ji nav nêzîkî 12 hezar malbatên koçber ku niha li parêzgeha Hesekê dimînin.
