Heseke-SANA
Şirketa Giştî ya Ava Vexwarinê û Kanalîzesyonê li parêzgeha Hesekê, bi hevkarî û hevahengîya ligel Komîteya Navdewletî ya Xaça Sor (ICRC) û Sazîya Heyva Sor a Erebî ya Sûrî, xebatên çaksazkirina hejmarek pompên binavî li projeya Elokê ya ku avê ji bo bajarê Hesekê, derdor û gundewarê wê yê rojava dabîn dike, bi dawî anîn.
Rêveberê Giştî yê Şirketê Ferhan El-ʼIweys di daxuyanîyekê de ji bo nûçegihanê SANAyê, îro Sêşemê dîyar kir ku bi saya karên çaksazkirinê li vê projeya jînewerî, 6 pompên bin avê ketine xizmetê û kişandina avê bi rêya wan ji nû ve dest pê kiriye, ku bi avêtina vê gavê hejmara bîrên projeyê yên ku niha dixebitin bûye 17 bîr û 3 pompên asoyî.
Navborî bal kişand ser wê yekê ku di çarçoveya projeyê de, xebatên çaksazkirina 2 bîrên din jî berdewam in, û dê di rojên pêş de têkevin xizmetê. Her wiha tekez kir ku bidawîanîna van xebatan dê bibe faktera ku av bêhtir bigihêje malên welatîyan û maweya pompekirinê bigîhêje 15 demjimêran.
Hêjayî gotinê ye ku projeya ava Elokê Tîrmeha borî piştî rawestandina çend salan ji nû ve hat xebitandin, 34 bîr û 8 pompên asoyî lê hene. Qebareya ava ku niha tê hilberandin bi rêya bernameyeke dana avê li gor tedbîrên kêmkirina demjimêrên belavkirinê bi rê ve diçe, û bajarê Hesekê, derdora wê û gundewarê wê yê rojava li ser 7 deverên pompekirinê dabeş dike, bi awayekî ku rojê carekê av bigihêje her deverekê ji van deveran.
