Laziqîye-SANA
Komîteya lêkolînê ku ji bo eşkerekirina hûrgulîyên wefata xortê bi navê Mihemed Ximêre hatibû erkdarkirin, îro Pêncşemê civîneke çapemenîyê li dar xist, da ku encamên herî girîng ên lêpirsînê û tedbîrên hatine wergirtin eşkere bike.
Xalên herî girîng ên civînê:
• Lîwa Ehmed Letûf, Serokê Komîteyê û Cîgirê Wezîrê Navxwe ji bo Karûbarên Polîsan: Rewşa tenduristîyê ya xortê bi navê Ximêre ya dirêjdem û tirsnak hebû û pêdivîya wî bi reftareke taybet hebû, lê di dema lêpirsînê de ev yek nehat kirin.
Kesên ku di karên xwe de xemsarî kirine, dê bi rêya dadgehê bên cezakirin.
• Lîwa Letûf di destpêka civînê de got: Me bi parêzgarê Laziqîyê re civînek li dar xist; wî hêsankarîyên pêwîst ji bo karên me peyda kirin.
Piştre me li lêpirsînên ku ji hêla Ewlehîya Hundirîn ve hatibûn kirin, nihêrt û me bi xwe dest bi lêpirsînê kir.
• Lîwa Letûf: Li gorî rapora pisporên bijîşkî, sedema mirinê encamên xwînrêjîya mêjî ye ji ber nexweşîya hemofîlîyê.
Birînên ku di rapora yekem de hatine dîyarkirin (birîneke tûj li alîyê rastê yê enîyê û kunek li tenişta wê) tedbîrên dermankirinê bûn ku li Nexweşxaneya Zanîngehê ya Laziqîyê hatine kirin.
• Lîwa Letûf: Qelişên çerm ên li ser zik ji ber dermankirina demdirêj a bi “Kortîzonê” ne û şînbûna biçûk a li ser enîya rastê û lingê çepê jî şînbûnên xwînrêj ên nexweşîyê ne.
• Lîwa Letûf: Dema pirs ji pisporan hat kirin derbarê xwînrêjîya ku bûye sedema mirinê, wan bersiv da ku di pişkinîna bijîşkê dadî de tu nîşanên tundûtûjîyê nehatine dîtin û tu şikestinên serî yan birînên giran nînin.
• Lîwa Letûf: Termê rehmetî Mihemed Ximêre radestî malbata wî hat kirin da ku li gorî rêûresman bê veşartin.
• Lîwa Letûf: Lêpirsîn bi Beşa El-Hefeyê re hat berfirehkirin da ku li ser rêkarên bi Ximêre re hatine bikaranîn rawestin.
• Lîwa Letûf: Komîte gihîşt wê encamê ku Ximêre ji endamên Ewlehîya Hundirîn re gotibû ku ew tûșî nexweşîya hemofîlîyê hatiye.
• Lîwa Letûf: Lêpirsînan peyitand ku lêkolînerekî şeqamek li stûyê xortê bi navê Ximêre xistiye.
• Lîwa Letûf: Biryar hat girtin ku lêkolîner Ehmed Cewad ji bo Dozgerîya Giştî ya Laziqîyê bê şandin, û ji Birêveberîya Doz û Șopandinê ya Wezareta Navxwe hat xwestin ku lêpirsîneke berfireh bi Neqîb Ehmed Şakir El-Misrî û lêkolîner Omer Yûsif re bikin û encaman di zûtirîn dem de ji me re bişînin.
• Parêzerê Giştî yê Parêzgeha Laziqîyê Usame Şenaq: Em soz didin we ku em ê dozê bi biryardarî bişopînin û em ê lezê bidin rêkarên yasayî da ku her kesê kêmasî yan paşguhxistinî di mirina xortê bi navê Ximêre de kiribe, cezayê xwe yê dadmendane bistîne.
• Emîd Samir El-Huseyn, Şêwirmendê Wezîrê Navxwe ji bo Karûbarên Yasayî û Mafên Mirovan: Mafên welatîyan parastî ne. Kesê girtî emanet e; rast e ew di bin cezayê sînordarkirina azadîyê de ye, lê ev ceza nabe destdirêjî li ser rûmeta wî be.
• Emîd El-Huseyn: Em li ser perwerdekirina endaman dixebitin da ku dezgeheke Ewlehîya Hundirîn ava bikin ku li gorî pîvanên herî bilind karê xwe bimeşîne.
• Rêveberê Îdareya Lêgerîna Tawanan Emîd Husên El-Hemadî: Di nav lêkolîna me de li ser dozê, em qebûl dikin ku kêmasî û paşguhkirin ji hêla serokê beşê û lêkolîner ve heye, ji ber ku rewşa nexweşîya Ximêreyê girtî di rapora fermî de nehatibû nivîsandin.
