Hesekê – SANA
Devera Milêbîyê ya li gundewarê Hesekê îro Şemîyê, bû şahida berdana komek girtîyên li cem HSDê û binçavkirîyên ku berê endamên wê bûn, yên ku di dema operasyonên sepandina qanûnê de di heyama borî de hatibûn girtin. Ev yek bi hewldan û serpereştîya tîma serokatîyê ya ku ji bo şopandina cîbicîkirina xalên peymana 29ê Kanûna Paşîn a ligel HSDê hatiye erkdarkirin, pêk hat.
Nûnerê serokatîyê yê ji bo şopandina cîbicîkirina xalên peymanê Emîd Zîyad El-Ayiş di daxuyanîyekê de dîyar kir ku, îro komeke nû ya girtîyan hat berdan, bi vê yekê hejmara kesên hatine berdan gihîşt nêzîkî 1500 girtîyan, û tenê hindikek mane, wek amadekarîyekê ji bo girtina vê dosyaya mirovî bi temamî.
El-Ayiş got: “Ev pêşhate wekî cîbicîkirina tiştê ku di 29ê Kanûna Paşîn de li ser hatibû lihevkirin tê, û li ser bingeha piştgirî û şopandina rasterast a birêz Serok Ehmed El-Şeri’ e, yê ku li vê dosyayê wekî dozeke mirovî ya di pileya yekem de dinêre, ne wekî dosyaya danûstandinê.”
Nûnerê serokatîyê destnîşan kir ku Wezareta Navxwe dê di qonaxa bê de, rêveberîya girtîgehên ser bi HSDê ve bi temamî wergire, her wiha Wezareta Dadê dê dest bi xwendina dosyayên hemû girtîyên ku bi dozên tawanbarîyê tên tohmetbarkirin bike, bi awayekî ku bidestxistina dadperwerîyê li gorî rênimayên qanûnî misoger bike.
Lê derbarê dosyaya kesên windayî de, El-Ayiş tekez kir ku tîma serokatîyê hewldanên xwe bi hevahengîya ligel alîyên peywendîdar didomîne, ji bo eşkerekirina çarenivîsa hemû windayîyên di girtîgehên HSDê de.
Di 19ê Adara borî de jî, komek girtî di girtîgehên HSDê de li Qamişlo û Hesekê hatibûn berdan, her wiha hinek ji binçavkirîyên ku berê endamên HSDê bûn, yên ku di dema operasyonên sepandina qanûnê de di heyama borî de hatibûn girtin.
Hikûmeta Sûrîyê di 29ê Kanûna Paşîn a borî de, lihevkirina ligel HSDê ya li ser agirbestê di çarçoveya peymaneke giştgir de ragihandibû, tevî têgihiştina li ser pêvajoya yekbûna lipeyhev a hêzên leşkerî û îdarî di navbera her du alîyan de, û derbasbûna hêzên ewlehîyê bo navenda her du bajarên Hesekê û Qamişlo, û wergirtina dewletê ji hemû sazîyên sivîl û hikûmî û dergeh û sînoran re.
