Şam- SANA
Wezareta Parastinê amadehîya xwe ji bo wergirtina kampa Holê ya li Hesekê û hemû girtîgehên “DAIŞ”ê yên li herêmê ragihand. Wezaretê tekez kir ku karê wê yê sereke şerê li dijî rêxistina terorîst a DAIŞê ye.
Wezaretê di daxuyanîyekê de ku îro Sêşemê li ser hesabê xwe yê Telegramê belav kir, bang li serkirdayetîya HSDê kir ku sozên xwe bi cih bîne û peymana 18ê Kanûna Duyem bi lez pêk bîne. Wezaretê careke din pabendbûna xwe bi parastina gelê me yê Kurd û misogerkirina ewlehîya wan nîşan da û soz da ku hêzên artêşê neçin nav gund û bajarokên Kurdan.
Desteya Operasyonan a Artêşa Sûrîyê jî di daxuyanîyekê de ji bo SANAyê eşkere kir ku rêxistina HSDê dest ji parastina Kampa Holê berdaye û kesên ku tê de girtî bûn berdane.
Desteyê her wisa tekez kir ku ew bi awayekî tevahî pabendî parastina gelê me yê Kurd û ewlehîya wan e, çunke artêş stargeha hemû Sûrîyan e û armanca wê vegirtina aramîyê û parastina sazîyên fermî ye.
Ji alîyekî din ve, Wezareta Hundirîn di daxuyanîyekê de ragihand ku piştî peymana dawî ya di navbera Hikûmeta Sûriyê û “HSD”ê de, “HSD”ê hejmarek ji girtîyên rêxistina terorîst a “DAIŞ”ê û malbatên wan ji girtîgehan berdan.
Wezaretê destnîşan kir ku ew rewşê ji nêz ve dişopîne û bi hevkarîya Hevpeymanîya Navdewletî hemû tedbîrên pêwîst digire daku aramî û ewlehî werin parastin.
Her wiha Wezareta Hundirîn dîyar kir ku piştî bûyera revê li girtîgeha Şedadê ya li gundewarê Hesekê, ku tê de nêzî 120 terorîstên “DAIŞ”ê ji girtîgeha di bin kontrola “HSD”ê de revîyan, yekîneyên Artêşa Sûrîyê derbasî bajarê Şedadê bûn.
