Hims-SANA
Berdevkê Wezareta Hundirîn, Nûreddîn El-Baba, hûrguliyên tawana kuştinê ya di 23yê Mijdara borî de li bajarokê Zeydelê li gundewarê Himsê çêbû, tawana ku zilamek û jina xwe tê de hatin kuştin, eşkere kirin. Lêkolînên pîşeyî yên Rêveberîya Lêkolînên Tawanê bi hevkarîya Hêzên Ewlekarîya Hundirîn, piştrast kirin ku sedemên tawanê tenê cînayî ne, û gotinên mezhebî yên bi xwîna qurbanîyan li cihê tawanê hatibûn nivîsandin, tenê hewldaneke têkçûyî ji bo xapandina dadê û çêkirina fitneyê bû.
Zanyarîyên derbarê tawanê û tawanbar de
- Tawanbar: Nasnameya gumanbarê sereke hat destnîşankirin û hate girtin, ew jî Mihemed El-Hemîd Bin Xelîfe, jidayikbûyê sala 1999an e, kurê xwişka qurbanî ye.
- Sedem: Kujer bi armanca dizîyê dest bi kiryara xwe kir, çûn û hatina xwe ya asayî bo mala qurbanîyan derfet dît û tawana xwe pêk anî.
- Veşartina tawanê: Piştî ku tawana wî ya dizîyê eşkere bû, xizmê xwe û hevjîna wî kuştin, paşê gotinên mezhebî bi xwîna wan nivîsandin û agir berda malê da nîşanên tawana xwe veşêre.
- Mukurhatin: Tîma Lêkolînên Tawanê karîye nîşan û delîlan bibîne û bi rêya wan bigihê tawanbar. Tawanbar li xwe mukur hat û hûrgîlîyên tawana xwe eşkere kirin. Her wiha hat zanîn ku wî madeyên hişbir bi kar tanîn, nemaze madeya metirsîdar a bi navê “Krîstal Met”.
Bersivdana Wezareta Navxweyî û tekezkirina li ser yekrêzîyê
- Zelalî: El-Baba dîyar kir ku lêkolînên destpêkê ji saetên pêşî yên tawanê de didan xuyakirin ku tawan cînayî ye.
- Çekên Bêkontrol: Berdevkê Wezaretê tekez kir ku dîyardeya çekên bêkontrol kêm dibe, û hevrêzî ligel Wezareta Berevanîyê heye ji bo çareserkirina wê.
- Helwesta xelkên Himsê: El-Baba pesnê hişmendîya niştecîyên Himsê û çalakvanên wê yên civakî da, yên ku dîyar kirin ku parêzgeha Himsê keleheke xurt e li hember çêkerên fitneyan, û tekez kir ku Hims dê bimîne nimûneya yekîtîya niştimanî.
- Peyketina kesên ku agirê fitneyê gur kirine: Berdevkê Wezaretê tekez kir ku Wezaret kiryarên derveyî qanûnê yên piştî tawanê red dike, û soz da ku her kesê bûye sedema xerabkirina ewlehî û aramîyê û derxistina fitneyê, dê were cezadan.
