Dêrazor-SANA
Îro bi dehan ji şênîyên parêzgeha Dêrazorê li Çerxerêya El-Medlecî li navenda bajêr, di bin dirûşma “Îna Eşîr û Êlên Sûrîyê” de xwepêşandanek li dar xistin. Lawên Dêrazorê binpêkirinên HSDê şermezar kirin û tekezî li ser yekîtîya xaka Sûrîyeyê kirin.
Xwepêşanderan her wisa tekezî li ser girêdana xwe bi bendên yekîtîya niştimanî kir. Hemû projeyên cudaxwaz û kiryarên dijminane yên HSDê bi dengekî bilind red kirin.
Welatîyê bi navê Usama Tirkî El-Cemala, ku yek ji şênîyên bajarokê Hecîn ê di bin kontrola HSDê de ye, ji nûçegihanê SANAyê re eşkere kir ku ew neçar maye bajarokê xwe biterikîne ji bo ku ji zordarî û binpêkirinên HSDê bireve. El-Cemala destnîşan jî kir ku HSD di cîbicîkirina Peymana 10ê Adara 2025an de, ku tevlîbûna wê di nav sazîyên dewleta Sûrîyeyê de ferz dike, xemsarîyê dike da ku projeyên xwe yên cudaxwaz li herêmê pêk bîne.
El-Cemala amaje bi wê yekê kir ku çareserî ew e ku hikûmeta Sûrîyê desthilata xwe li ser hemû herêman ferz bike û da zanîn ku armanca lidarxistina vê xwepêşandanê tekezkirina mafê koçberan ê vegera li herêm û xaka xwe ya ku jê hatine koçberkirin e. Her wiha piştrast kir ku xwepêşandan dê berdewam bin heta ku HSDê ji van herêman derkeve.
Tê zanîn ku dawîya meha borî çalakîyên nerazîbûnê di bin dirûşma “Dengekî Yekgirtî ji bo Cezîrê” li piranîya parêzgehên Sûrîyeyê hatin lidarxistin û beşdaran kiryar û binpêkirinên HSDê dijî şênîyan bi tundî şermezar kirin.
