Gundewarê Şamê – Sana
Parêzerê Giştî yê Gundewarê Şamê, Dadwer Mihemed Umer Hacir, ragihand ku goreke komel li devera Bihêre ya li ‘Uteybayê hatiye dîtin, laşên nêzî 170 kesên sivîl ji xelkên Gotaya Rojhilatê Şamê û derdora wê, ji wan kesên ku hewil didan ji dorpêçê û birçîna berî çend salan bazbidin, têde hene.
Dadwer Hacir ji Sanayê re ragihand ku yekîneyên ewlekarî û polîsan hin agahî wergirtin ku şûnmayin laşên micovan li wê deverê hene, yekser berê xwe dan wî cihî, hin qoqên seriyan û hestiyên kesên sivîl dîtin, ew kesên ku ketibûn kemîneke hêzên rêjîma têkçûyî de dema dixwestin di wê deverê re derbas bibin.
Dadwer diyar kir ku bombeyên bin erdê di wê kemînê de hebûn, pişt re ew kesên sivîl hatine gullebarankirin, paşre laşên wan bi rengekî bêserûber di xendeqeke dirêj de bi makîneyin mezin hatine veşartin, li devereke herrî ya gelek çît lê hene, ji ber wê yekê dîtina wan bi salan dereng ma.
Û Dadwer Hacir tekez kir ku dozgeriya giştî bi alîkariya berevaniya sivîl û desteya Niştimanî ya Wendayan dest bi lêpirsînan kir, di dema ku karê rakirina laşan ji bo komkirina wan li rex Desteya Naskirinê berdewam bû, da xelk karibin mirovên xwe nas bikin, berî ku wan li gor rêzikên yasayî binax bikin.
Dadwer tekez kir ku lêpirsîn dê bi awayekî yekser berdewam bin ji bo destnîşankirina tawankaran û sizdana wan li dadgehê, û got ku ev tawan yek ji kirêttirîn tawanên ku li dijî sivîlan hatine pêkanîn û divê tawankar bi tundî li gor yasayê werin sizadan.
Dîtina goristaneke komel li ‘Uteybayê, êşeke mezin xist dilê sûriyan, hizr û bîra derdeseriyên xelkê di salên şoreşê de nû kirin, û dadwer tekez dikin ku dê edalet bicî were, her kesê tawankar dê were sizadan, û erkê dewletê ye ku rûmeta qurbaniyan biparêze û mafên malbatên wan bide wan û edalet û lêpirsîna niştimanî dabîn bike.
Bêjeyên sereke: ‘Uteybe, tawanên rêjîma têkçûyî, goristaneke komel
