Wezîrê Perwerde û Hînkirinê Mihemed Ebdulrehman Tirko tekez kir ku gihandina mafê perwerdeyê ji bo her zarokekî Sûrî li seranserî erdnîgarîya Sûrîyê, ji destpêka qonaxa nû ve pêşgavîyeke bingehîn a karê wezaretê ye, li gorî Danezana Destûrî ku ev maf parastiye.
Tirko got: “Wezaret di sala borî de di lidarxistina ezmûnên giştî yên her du bawernameyên amadehî û lîseyê de li hemû parêzgehan bi ser ket,” û dîyar kir ku ezmûna otomasyona tevahî ya ezmûnan ne serkeftî bû, lewra wezaret vegerîya ser şêwaza pirsên cihêreng.
Derbarê xwendekarên ku ji derve vedigerin, Tirko piştrast kir ku mafê wan heye sala xwendinê bidin destpêkirin bêyî ku mercê hebûna hemû belgeyan, bi dayîna dema salekê ji bo temamkirina wan, an jî heke tu belge tunebin bikevin ezmûna destnîşankirina astê, da ku mafê wan ê perwerdeyê were parastin.
Têkildarî kadroyên hînkirinê û pêşxistina rêbazên xwendinê, Tirko got: “Wezaretê biryarên zû ji bo vegerandina mamosteyên dûrxistî derxist, ku nêzîkî 22,500 mamosteyan daxwazname pêşkêş kirin. Wezaret niha li ser danîna pîvanên nûjen dixebite ji bo avakirina rêbazeke xwendinê ya nûjen ku li gorî geşedanên cîhanî be.”
Di dawîyê de jî, Wezîrê Perwerde û Hînkirinê Mihemed Tirko destnîşan kir ku pêşxistina perwerdeyê pêvajoyeke berhevkirî ye û pêdivîya wê bi demê heye. Tirko tekez jî kir ku wezaret bi gavên xurt kar dike ji bo misogerkirina mafê zarokan di perwerdeyê de û pêşxistina sazûmana perwerdehîyê.
