Şam-SANA
Rêveberê Rêveberîya Ragihandinê li Wezareta Enerjîyê Ebdilhemîd Selat, piştrast kir ku sererastkirina bihayên berhemên petrolê li Sûrîyê ji ber şert û mercên awarte û guherînên demkî yên li bazarên enerjîyê yên cîhanî rû daye, ku bûne sedema bilindbûneke berbiçav di lêçûna dabînkirina van berheman de.
Selat dîyar kir ku ev biha ne li ser rêyeke neguher an yekalî ne, lê li gorî guherîna lêçûn û mercan, tên kêmkirin û zêdekirin.
Îro Yekşemê Ebdilhemîd Selat di daxuyanîyekê de ji bo SANAyê da zanîn ku ev sererastkirin ji alîyê Komîteya Dîyarkirina Bihayên Berhemên Petrolê û Samanên Madenî ya berpirsa vê dosyayê ve pêk hatiye; ew jî piştî lêkolînkirina tevgera bazarên cîhanî, lêçûnên dabînkirin, veguhestin û sîgorteyê, asta peydabûna van berheman li bazaran û hemû faktorên girêdayî misogerkirina sotemenîyê û gihandina wê bo bazara Sûrîyê.
Navborî axaftina xwe wiha berdewam kir: “Em dizanin ku sererastkirina bihayan barekî zêde dixe ser milê welatîyan, nemaze di bin sîya şert û mercên jîyanê û asta dahata heyî de. Lê belê îro Sûrîye ji bo dabînkirina pêdivîyên xwe yên ji berhemên petrolê bi rengekî mezin pişta xwe bi hawirdekirinê girê dide; lewma ne pêkan e lêçûna peydakirina van madeyan ji guherînên li bazarên cîhanê were cudakirin.”
Selat her wiha got: “Hinek wisa dihizirin ku berhema petrolê ya Sûrîyê têra pêdivîya bazara navxweyî dike, lê ev yek ne rast e”.
Rêveberê Rêveberîya Ragihandinê li Wezareta Enerjîyê Ebdilhemîd Selat bal kişand ser wê yekê ku berhemanîna navxweyî îro nêzîkî 100 hezar bermîl di rojê de ye, di demekê de ku pêdivîya bazarê ji 300 hezar bermîlan zêdetir e û bi rêjeyeke navînî di navbera 300 û 325 hezar bermîlî de ye di rojê de; ango berhemanîna navxweyî tenê nêzîkî sêyeka pêdivîyê dabîn dike.
