Şam-SANA
Encumena Sûrî ya Hevahengîya Encumenên Kar, peymana kar a encumenên kar ên hevbeş ên Sûrîyê û rêbera karê serok û damezrînerên encumenan da destpêkirin. Ev yek di dema çalakîyên Konferansa Niştimanî ji bo Dîyaloga Sektora Taybet li Şamê pêk hat, bi armanca avakirina lêvegereke sazûmanî ya yekgirtî ku karê sektora taybet a Sûrîyê di têkilîyên wê yên aborî de ligel welatên hevkar birêkûpêk dike.
Wezîrê Aborî û Pîşesazîyê Nîdal El-Şear, di gotarekê de di dema çalakîya ku duh Sêşemê li Koşka Konferansan hat lidarxistin de, tekez kir ku ev peyman di çarçoveya arasteya dewletê de tê ji bo jinûveavakirina amûrên xwe yên aborî li ser bingehên sazûmanî yên gihiştîtir, bi awayekî ku encumenên kar bike kanaleke birêxistinkirî ku beşdarîyê di pêkanîna pêşîneyên aborî yên dewletê de bike, nexasim zêdekirina hinardeyan, kişandina veberhênanan û vekirina bazaran li pêşîya şirketên niştimanî.
Serokê Encumena Sûrî ya Hevahengîya Encumenên Kar Ehmed Rewad Remezan dîyar kir ku sîstema niştimanî ya yekgirtî dengê sektora taybet bi awayekî sazûmanî li pêşîya welatên hevkar xurt dike û têkilîyên aborî bi rêk dixe. Her wiha wî lê zêde kir ku sîstem pişta xwe dide rêveberîya baş û birêkûpêkîya sazûmanî ji bo piştgirîkirina geşepêdana aborî, dabînkirina derfetên kar û pêşxistina jêhatîbûnên niştimanî.
Sîstemê çar armancên sereke ji bo karê encumenên kar destnîşan kirin, ku ev in: Zêdekirina hinardeyên Sûrîyê, kişandina veberhênan û şirîkatîyên aborî, dabînkirina derfetên kar ji bo şirketên Sûrî, û xurtkirina şîyana sektora taybet û şîyana wê ya hevrikîyê di asta navdewletî de.
