Şam-SANA
Wezîrê Aborî û Pîşesazîyê Nidal El-Şeʼar, tekez kir ku vegera herêmên Cizîrê di warê aborî de guhetineke erênî ye ku rê li ber destpêkirineke nû ya avakirina welat vedike, û got ku pêvajoya başbûnê ji karê li ser hev û berdewam pêk tê.
El-Şeʼar dîyar kir ku rewşa Reqayê û deverên rizgarkirî ji ber zirara gihîştiye torên av, kehrebe û rêyan zehmet e. Ji ber vê yekê, vegerandina xizmetên bingehîn giring e berî veberhênana çavkanîyan; bi taybetî ku Reqa xwedî av û zevîyên berhemdar e, lewra ew kare bibe bingeha pîşesazîyên çandinî.
Wezîr amaje bi avakirina komîteyeke teknîkî kir ji bo nirxandina rewşa çaksazkirina kargeha şekir a Meskeneyê, û dîyar kir ku ji ber kêmbûna çavkanîyan pêvajoya avakirinê dijwar e.
Di dosyaya enerjîyê de, wezîr bal kişand ser ku sûdewergirtina ji çavkanîyên avê hêsantir û leztir e ji yên petrolê ku hewceyî çaksazkirineke giştî ne. Her wiha dîyar kir ku heye xebitandina hin bîran di nava 6-9 mehan de pêkan be, ligel xebata ji bo avakirina parzûngeheke nû li Himisê û nûjenkirina xetên veguhestina petrolê.
El-Şeʼar aşkere kir ku nîşanên başbûnê bi xebitandina bi sedên kargehan, destûrdana 3560 kargehên nû û anîna xetên hilberînê yên nûjen dîyar bûne. Lê belê, kêmbûna kedkarên pispor bûye sedema destpêkirina programeke rahênanê.El-Şeʼar tekez kir ku rola hikûmetê bi dabînkirina hêsankarîyan e, û sektora taybet di çarçoveya modela “Aborîya Azad a Xwedan Armanc” de şirîkekî sereke ye.
