Şam-SANA
Wezîrê Dadê yê Sûrîyê Mezher El-Weys, ligel Rêvebera Giştî ya Rêxistina Qedexekirina Çekên Kîmyewî Sabrina Dallafior û şandeya pê re, rêyên xurtkirina hevkarîyê di çareserkirina dosyaya çekên kîmyewî de li Sûrîyê gotûbêj kirin.
Di hevdîtinê de her wiha hewldanên hikûmeta Sûrîyê yên ji bo temamkirina vê dosyayê bi hevkarîya ligel rêxistinê hatin gengeşekirin.
Wezaretê îro Sêşemê li ser kanala xwe ya Telegramê dîyar kir ku hevdîtina ku li avahîya wezaretê li Şamê bi amadebûna Serdozgerê Komarê Dadwer Şêwirmend Hesan El-Turbe û Nûnerê Daîmî yê Sûrîyê li Rêxistinê li Lahayê Mihemed Ketûb pêk hat, li ser lêkolînkirina pirsên girêdayî berpirsyarî û lêpirsîna qanûnî ya derbarê bikaranîna çekên kîmyewî de sekinî.
Di heman demê de tekezî li ser wê yekê hat kirin ku ev pêvajo li gorî çarçoveyên qanûnî yên pêwendîdar, beşdarî pêkanîna dadmendîyê ji bo qurbanîyan dibe.
Hêjayî gotinê ye ku Encumena Rêveber a Rêxistina Qedexekirina Çekên Kîmyewî di nehê Tîrmeha borî de bi lihevkirinê, projebiryara taybet bi vegerandina maf û îmtîyazên Komara Erebî ya Sûrîyê li gorî Peymana Qedexekirina Çekên Kîmyewî pejirandibû.
Ev gav piştgirîyeke berfireh ji bo Sûrîyê û hewldanên wê yên di çareserkirina mîrateya bernameya kîmyewî ya rejîma hilweşîyayî ya Esed de nîşan dide.
