Washingotn-SANA
Şirketa Microsoftê reşnivîseke koda reftarê ya nû amade kir ku armanca wê danîna rêzik û pîvanan e ji bo birêvebirina karê modelên zîrekîya çêkirî yên ku ew bi xwe bi pêş dixe. Reşnivîs tekezîyê li wê yekê dike ku pêwîst e mirov pêşengîyê bikin û kontrol di destên wan de be û rê li ber sîsteman bê girtin da ku nikaribin biryarên serbixwe bistînin ku derveyî erka wan a dîyar e.
Tora Sky Newsê îro Sêşemê dîyar kir ku Microsoftê reşnivîs ji bo şêwirên giştî ji bo heyama şeş hefteyan pêşkêş kiriye. Mebest ji reşnivîsê ew e ku bê nirxandin da ku guhartoyeke sererastkirî di demeke paşê ya îsal de bê derxistin, ew jî li ser wê bingehê ku ji sala 2027an û pê ve ji bo birêverbirin û arastekirina pêşxistina modelên şirketê bê bikaranîn. Şirketê amaje pê kir ku rêzikên pêşnîyazkirî niha di perwerdekirina modelên şirketê de nayên bikaranîn
Reşnivîs tekez dike ku divê modelên zîrekîya çêkirî li dijî destwerdana mirovan, sererastkirina rêya wan, rawestandina erkên wan, betalkirin an jî sekinandina wan dernekevin, her wiha li wan qedexe dike ku biryarên sekinandinê dereng cîbicî bikin an jî gavan biavêjin ku destwerdana mirovan zehmettir bikin
Rêzikên pêşnîyazkirî modelan neçar dikin ku qada erkên xwe yên dîyarkirî berfireh nekin an jî j xwe re armancên nû neafirînin û di rewşa nezelalîya sînorên erkê de, divê ew şîrovekirina herî parêzkar bi kar bînin an jî daxwaza zelalkirinên zêdetir bikin
Her wiha reşnivîs tekez dike ku divê reftar û tomarên sîstemên zîrekîya çêkirî ji alîyê mirovan ve bên fêmkirin û nirxandin, û qedexe dike ku ew şopên kiryarên xwe veşêrin an jî navgînên têklîyê di navbera sîsteman de bi kar bînin ku fêmkirin an şopandina wan ji bo mirovan zehmet be.
Rêzik daxwaza wê yekê dikin ku pêwîst e kêmtirîn desthilatên pêwîst ên cîbicîkirina erkan ji bo modelan bê dayîn û rê li ber wan bê girtin ku negihêjin dane/data an sîstemên ku ne têklidarî erka wan e. Her wiha rê li ber wan bê girtin ku hewla berfirehkirina desthilatên xwe û derbasbûna sînorên ku ji alîyê birêveber ve hatine danîn, bikin. Ji vê zêdetir jî, reşnivîs sînorên wisa datîne ku model nikarin di bin tu mercî de derbas bikin heta ku ev yek bibe sedema têkçûna erka wan jî.
