Waşington-SANA
Tîmekê ji lêkolînerên Kompanya Apple, teknolojîyeke nûjen eşkere kir ku dibe di siberojê de rê bide berguhkên AirPodsê ku nîşanên elektrîkî yên mêjî fam bikin. Ev yek xwe dispêre şêwaza “fêrbûna xweser” bi rêya zîrekîya destkird (AI), bêyî hewcedarîya daneyên ku pêşwext hatine şîrovekirin.
Li gorî malpera “9to5Mac” a taybet bi nûçe û berhemên Kompanya Apple, navê vê teknolojîyê “PARS” e. Ev teknolojîya nû dihêle ku model îşaret-elektrodên mêjî (EEG) rasterast ji daneyên xam rave bike. Ev yek piştgirêdana bi daneyên bijîşkî ku ji bo destnîşankirina qonaxên xewê yan dîyarkirina krîzan têne bikaranîn û di warê darayî de giran in, kêmtir dike.
Lêkolînê dîyar kir ku ev modela nû fêrî pêşbînîkirina guherînên demî yên di navbera beşên cuda yên çalakîya mêjî de dibe, loma jî ev yek jê re dibe alîkar ku li şûna ku tenê li ser rênimayên amade raweste, bingeha giştî ya sînyalan fam bike.
Ev gav bi daxwaznameya dahênanê re hevdem e ku Apple ji bo amûreke lixwekirinê pêşkêş kiriye, ku nîşanên jînwarî bi rêya guh dipîve. Her wiha şîyana zêdekirina hestewerên din û modeleke zîrekîya destkird ji bo berguhkên AirPodsê heye ku elektrodên herî baş ji bo wergirtina sînyalan hilbijêre; ev jî rê li ber nifşekî zîrektir ê amûrên lixwekirinê vedike.
