Moskow-SANA
Serok Ehmed El-Şeri` û Serokê Rûsyayê Vladîmîr Pûtîn, di hevdîtina xwe ya îro Çarşemê li Kremlînê li Moskowê, kûrbûna têkilîyên Sûrîye û Rûsyayê û geşedana wan a berçav di warên cuda de tekez kirin. Her duyan bal kişand ser girîngîya berdewamîya hevahengî û hevkarîya dualî ya di navbera her du welatan de.
Serok Pûtîn di hevdîtinê de got: “Em kêfxweş in ku piştî demekê ji hevdîtina me ya dawî, we dîsa li Moskowê dibînin. Me li ser asta aktîvkirina têkilîyên dualî û pêşxistina asta hevkarîyê di warê aborî de gelek kar kirin û em hewl didin têkilîyan di hemû waran de pêş bixin.”
Serokê Rûsyayê bal kişand ser ku alîyê aborî wekî hêleke girîng a hevkarîya dualî û dîyar kir ku gelek mijarên din di rojevê de ne. Her wiha amadehîya welatê xwe ji bo beşdarîya di xebatên avadankirinê de nîşan da û got ku Rûsya dizane gelek tişt hene ku divê ji nû ve werin avakirin.
Derbarê geşedanên li herêma Cizîra Sûrîyê, Serok Pûtîn tekezî li ser piştgirîya Rûsyayê ji bo yekparçeyîya Sûrîyê kir û got: “Em piştgirîyê didin hewldanên we yên ji bo vegerandina silametî û yekparçeyîya axa Sûrîyê, û em we ji ber serkeftina vê pêvajoyê pîroz dikin. Em her tim piştgirê yekparçeyîya Sûrîyê bûn û em ê her wisa bin. Em hêvî dikin ku vegera rojhilatê Firatê bo Şamê bibe gaveke girîng di vî alî de, da ku yekparçeyîya axa Sûrîyê bi temamî pêk were.”
Ji alîyê xwe ve, Serok Ehmed El-Şeri` girîngîya têkilîyên Sûrîye-Rûsyayê û pêşketina wan a berbiçav di sala borî de tekez kir. Serok El-Şeri` bal kişand ser rola Rûsyayê di piştgirîkirina yekparçeyî û aramîya Sûrîyê de, tevî beşdarîya wê di xurtkirina ewlehî û aramîyê de li seranserî herêmê.
Serok El-Şeri` bal kişand ser hinek sembolên dîrokî ku di dema çûyîna xwe ya bo Kremlînê de hîs kirine û got: “Dema ez ji firokxaneyê dihatim, min rêyeke tije berf ber bi Kremlînê ve dît. Vê yekê dîrok anî bîra min; gelek helmetên leşkerî hebûn ku tê de hinek alîyan hewl dida bigihêjin Moskowê, lê wêrekîya leşkerên Rûs û xwezayê rola xwe di parastina vê axê de lîstin.”
