Belem – SANA
Serok Ehmed El-Şeri’ piştrast kir ku Sûrîye xebatê ji bo avakirina têkilîyên erênî bi welatên cîhanê re dike, û hilanîna cezayan û vegera rola wê ya herêmî, di berjewendîya her kesî de ye, û got ku “dîrokeke nû bi çêbûna Sûrîya nû dest pê kiriye.”
Dema ku Serok El-Şeri’ li Civîna Keşûhewayê COP30 ya li Brezîlyayê bû, di hevpeyvînekê de bi Televîzyona El-Şarq re, da xuyakirin ku rejîma berê Sûrî bi dirêjîya dehên salan ji cîhanê veqetandibû, lê ew îro careke din wekî dewleteke çalak vedigere cihê xwe yê asayî.
Derbarê têkilîyên bi Waşingtonê re, got ku rêbaza wî ew e ku divê “bi karê ser erdê dest pê bibe” û tekezî li ser girîngîya têkilîyên stratejîk bi Amerîkayê re kir, û got ku ew hêvîdar e ku pêşeroja têkilîyên bi Amerîkayê re di serdana wî ya çaverêkirî de bo Koşka Spî were gotûbêjkirin.
Serok Elşeri’ destnîşan kir ku têkilîyên bi Erebistana Siûdî û welatên din ên herêmê re li ser bingeha ewlehîya hevbeş û hezkirin di nav gelan de ava dibin, û tekez kir ku aramîya Sûrîyê û ya Erebistana Siûdî bi hev ve girêdayî ne.
Derbarê hilanîna cezayan de, got ku ew gaveke li ser rêça rast e û lihevkirineke navneteweyî ya kêmpeyda li ser heye, û rola Erebistana Siûdî, Tirkîye, Qeter, Îmarat û welatên Ewropî di piştgirîya Sûrîyeyê de bilind nirxand.
Di dawîya hevdîtinê de, got ku beşdarîya Sûrîyê di Lûtkeya Keşûhewayê de derfetek e ji bo ku “Sûrîya nû” were naskirin, û têkilîyên hevparîyê bi welatên herêmê û cîhanê re werin avakirin.
