Waşington-SANA
Serokê Amerîkayê Donald Trump tekez kir ku hikûmeta Sûrîyê ji bo avakirina dewleteke rasteqîn û pêşketî kar dike. Trump dîyar kir ku yek ji tiştên ku gelekî alîkarîya wê kiriye, bidawîanîna cezayên dijwar û pir biêş e.
Trump duh di parvekirinekê de li ser platforma xwe “Truth Social”ê amaje bi wê yekê kir ku Amerîka ji encamên ku li Sûrîyê hatine bidestxistin gelekî razî ye, ku ev yek bi saya xebata dijwar û îradeyê pêk hatiye. Her wiha eşkere kir ku Amerîka hemû hewldanên xwe dike da ku piştrast be hikûmeta Sûrîyê li ser pêkanîna her tiştê pêwîst ji bo pêşketina welatê xwe berdewam e.
Serokê Amerîkayê got: “Gelekî girîng e ku Îsraîl dîyalogeke xurt û rastîn bi Sûrîyê re biparêze, û tiştek rû nede ku li dijî pêşketina Sûrîyê ya ber bi dewleteke pêşketî ve be.”
Trump axaftina xwe wiha kuta kir: “Serokê Sûrîyê Ehmed El-Şeri’ bi xebateke dijwar kar dike ji bo misogerkirina rûdana tiştên baş, û da ku Sûrîye û Îsraîl bi hev re bibin xwedî têkilîyeke demdirêj û pêşketî. Ev derfeteke dîrokî ye, û li ser wê serkeftina ku hatiye bidestxistin tê zêdekirin, ji bo aştîya li Rojhilata Navîn.”
Tê zanîn ku Serok El-Şeri’ di 9ê Mijdara borî de serdaneke fermî bo Waşingtonê pêk anîbû ku sê rojan dewam kir. Di wê serdanê de, li Koşka Spî bi Serokê Amerîkayê Donald Trump re civîneke gotûbêjan li dar xistibû, bi beşdarîya Wezîrê Karên Derve yê Sûrîyê Es’ed Hesen El-Şeybanî û Wezîrê Karên Derve yê Amerîkayê Marco Rubio û çend berpirsan. Di hevdîtinê de behsa rêyên bihêzkirina têkilîyên dualî yên Sûrîye-Amerîka, rakirina cezayan û pêşxistina hevkarîyê di warên cuda cuda de hatibû kirin.
