Şam-SANA
Wezîrê Karên Derve û Koçberan Es’ed Hesen El-Şeybanî tekez kir ku guhertina ku dîplomasîya Sûrîyê îro tê de derbas dibe, guherîneke dîrokî ye ku Sûrîyê bi awayekî şayîste û geş ku şaristanî û pêgeha wê nîşan dide, ji nû ve raber dike, piştî ku bi dehan salan ji ber sîyasetên rejîma berê dinalîya.
El-Şeybanî îro di hevpeyvînekê de ligel kanala El-Îxbarîye ya Sûrîyê got: “Dîplomasîya nû ya Sûrîyê karî dengê gelê Sûrîyê bigihîne cîhanê, daxwazên wî bîne ser zimên û ji bo çareserkirina bandorên qonaxa berê kar bike.”
Derbarê dosyeya Hêzên Sûrîya Demokratîk (HSD) de, Wezîrê Derve dîyar kir ku hikûmet dîyaloga xwe bi nûnerên “HSD”ê re didomîne bi armanca yekxistina sazîyên herêmê di nav sazîyên dewletê de. El-Şeybanî tekez jî kir ku çareserî dê li ser hîmê lihevkirineke niştimanî be ku yekîtî û aramîya welêt misoger bike û got: “Ji bo herêma Bakurrojhilatê Sûrîyê derfeteke dîrokî heye ku di vê qonaxê de bibe beşeke çalak û her derengîyek di cîbicîkirina Peymana 10ê Adarê de dê neyînî be û berjewendîyên sivîlan û vegera koçberan bo herêmên xwe asteng bike, ji ber vê yekê em dibînin ku divê hevkarî di zûtirîn dem de pêk were.”
Di berdewamîya axaftina xwe de, El-Şeybanî destnîşan kir ku sîyaseta derve ya Sûrîyê îro xwe ji polarîzasyon û mihweran dûr dixe, û dîyalog vekirîbûn û hevkarîya hevseng bi hemû alîyan re dimeşîne û ji bo piştgirîkirina hewldanên jinûveavakirinê, rakirina cezayên aborî û misogerkirina vegera birûmet a penaberên Sûrî dixebite.
El-Şeybanî eşkere kir ku beşdarbûna Sûrîyê di Komeleya Giştî ya Neteweyên Yekbûyî de bûyereke dîrokî ye û destpêka serkeftina wê ya di asta navneteweyî de bû û bû alîkar ku rola Şamê û dengê gelê wê cara yekem rasterast li pêşberî civaka navneteweyî bêyî tu helwestên şermezarkirinê derkeve pêş.
Wezîrê Derve amaje bi wê yekê jî kir ku pêwendîyên bi welatên Ereb re pêşketineke berbiçav bi xwe ve dibînin û her wiha pêwendîyên bi welatên dost re, Rûsya û Çîn di nav de, ber bi jinûveavakirineke hevseng a li ser bingehê wekhevî û rêzgirtina dualî ve diçin, ku xizmeta berjewendîyên gelê Sûrîyê dike.
El-Şeybanî destnîşan kir ku pêwendîya bi Rûsya û Çînê re divê ji bo berjewendîya gelê Sûrîyê were bikaranîn û got: “Me têkilîya bi Çînê re -ku ji alîyê sîyasî ve li kêleka rejîma berê bû û “veto” ji bo berjewendîya wê bi kar dianî- sererast kir û di destpêka meha bê de dê yekem serdana fermî ji bo Pekînê li ser vexwendina fermî ya hikûmeta Çînê pêk were.”
Derbarê pêwendîyên bi Lubnanê re, El-Şeybanî got ku Sûrîyê di sererastkirina pêwendîyên xwe yên bi Lubnanê re li ser hîmê rêzgirtina dualî û hevkarîyê bi awayekî ku xizmeta berjewendîyên her du gelên bira bike, berdewam e.
El-Şeybanî da zanîn ku dosyeya penaberên Sûrî li Lubnanê ji alîyê Şamê ve bi taybetî tê şopandin û ji bo birêxistina vegera wan a birûmet û domdar dixebite û her wiha da zanîn ku pêşketineke berbiçav di dosyeya girtîyên Sûrî de li Lubnanê, nemaze li Girtîgeha Rûmîyeyê, heye.
El-Şeybanî tekez kir ku Îsraîl xwedî projeyeke berfirehbûnê ye û hewl dide bi mifawergirtina ji guhertina ku li Sûrîyê çêbûye, ketwareke nû ferz bike û piştrast kir ku Şam her cure perçekirin û federalîzmê red dike û ev yek ne hewceyî gengeşe û danûstandinan e.
Derbarê rewşa parêzgeha Siweydayê, El-Şeybanî tekez kir ku tiştên li wir qewimîn birîneke niştimanî ye û ji alîyê gelek alîyan ve, bi taybetî Îsraîlê, hatiye bikaranîn û tekez kir ku xelkê Siweydayê beşekî resen ê pêkhateya niştimanî ya Sûrîyê ye.
Di dawîya axaftina xwe de jî, El-Şeybanî da zanîn ku qonaxa bê qonaxa avakirin û aştî û parastina maf û qurbanîyên gelê Sûrîyeyê ye û tekez kir ku karê dîplomasîya Sûrîyê dê bibe dengê rastîyê û mertalê parastina serwerîya niştimanî.
