Şam-SANA
Serokê Encumena Gel Ebdilhemîd El-`Ewwak bang li endamên encumenê kir ku ji bo yekkirina hewldanan kar bikin da ku pêgeha sazîya yasadanînê xurt bikin û wêneya klasîk a ku rejîma berê di nava zêdetirî 60 salî de li ser parlamentoyê ava kiribû, ji holê rakin.
El-`Ewwak di gotarekê de îro Yekşemê li pêşberî encumenê piştî temambûna avakirina ofîsa cîbicîkar, piştrast kir ku birêvebirina parlamentoyê berpirsîyarîyeke komî ye û serkeftin an sernekeftina wê berpirsîyarîya hemû endaman e.
Wî destnîşan jî kir ku divê hemû kar û çalakîyên parlamenî di bin banê encumenê de werin kirin da ku rûmet û rola wê xurt bibe.
El-`Ewwak eşkere kir ku encumen dê bi desthilata cîbicîkar û nemaze bi Serokê Komarê re hevkarîyê bike. Wî dîyar kir ku welat di qonaxeke veguhêz a zemet de derbas dibe, û gel ji her du desthilatên qanûndanîn û cîbicîkar li benda gelek tiştan e; lewra pêwîst e hevkarîyeke mezin hebe û pêvajoya yasadanînê hêsan bibe, da ku piştgirîyê bidin hewldanên hikûmetê yên jinûveavakirin û pêşkêşkirina xizmetguzarîyan.
El-`Ewwak li ser navê endamên Encumena Gel sersaxî da xelkê Dêrezorê ji bo qurbanîyên xeniqîna keştîyê di Çemê Firatê de.
Her wiha amaje pê kir ku encumen dê bi rêya komîteyeke amadekar dest bi amadekirina Rêziknameya Hundirîn bike û paşê dê ji bo dengdanê pêşkêşî endamên encumenê bê kirin.
Li dawîyê jî, Serokê Encumena Gel Ebdilhemîd El-`Ewwak bipaşxistina rûniştinê heta roja Yekşemê 26.07.2026an ragihand, da ku fersend ji komîteyê re hebe ku karên xwe temam bike.
