Quneytira-SANA
Îro Pêncşemê, şandeyeke Hêza Çavdêrîya Veqetandinê ya Neteweyên Yekbûyî li Colana Sûrîyê ya dagirkirî (UNDOF), ligel Rêveberê Navçeya Bakur Mihemed El-Seîd û Serokê Şaxê Heyva Sor a Erebî ya Sûrîyê li Parêzgeha Quneytirayê Dr. Rebî’ Osman, mekanîzmaya avakirina kampên bijîşkî yên gerok gotûbêj kirin, da ku xizmetê ji şênîyên gund û bajarokên parêzgehê re pêşkêş bikin.
Di civînê de, li ser avakirina yekemîn kampa bijîşkî li Şaredarîya Um Batineyê di 22ê vê mehê de lihevkirin pêk hat, da ku paşê bi hevahengîya parêzgehê li navçeyên cuda bigere.
El-Seîd di daxuyanîyekê de ji bo nûçegihanê SANAyê dîyar kir ku armanca kampê pêşkêşkirina şêwirdarîyên bijîşkî ye ji alîyê bijîşkên ser bi UNDOFê ve, ligel belavkirina dermanan bi rêya Heyva Sor a Erebî ya Sûrî.
Navborî da zanîn jî ku kamp dê berdewam û gerok be; her du hefteyan carekê dê li şaredarîyekê yan gundekî nû yê parêzgehê were danîn da ku bigihîjin hejmara herî zêde ya welatîyan û xizmetên tenduristîyê bigihînin wan.
