Şam-SANA
Şêwirmendê Tenduristîya Derûnî li Desteya Niştimanî ya Windayan Dr. Wail El-Ras, tekezî li ser girîngîya eşkerekirina çarenivîsa windayan ji bo başbûna derûnî ya malbatan kir, û destnîşan kir ku divê rûmeta qurbanîyan were parastin û piştgirîya derûnî û civakî ji malbatan re were pêşkêşkirin.
Navborî îro Duşemê di daxuyanîyekê de ji bo SANAyê tekez kir ku windabûna endamekî malbatê bêyî zanîna çarenivîsa wî serpêhatîyeke biêş e ku wekî “Windabûna Nezelal” tê naskirin; ji ber ku nebûna wî ya laşî û hebûna wî ya derûnî dibe sedema rewşeke nedîyarîyê ku rê li ber malbatê digire da ku xwe biguncîne û bi pêş ve biçe.
El-Ras dîyar kir ku dibe windabûna nezelal bi bandorên derûnî yên wekî dilgiranî, depresyon (xem û bêhtengî), têkçûna xewê û nexweşîya piştî belayê ve girêdayî be, û bandorê li têkilî û rolên malbatî û civakî dike, bi taybetî dema ku ev nebûn ji bo salên dirêj berdewam dike.
Başbûna Derûnî ya Malbatan
Şêwirmendê Derûnî da zanîn jî ku eşkerekirina çarenivîsa windayan ji bo başbûna derûnî û bidawîkirina “Windabûna Nezelal” bingehîn e, ku ev yek derfetê dide malbatan ku rastîyê qebûl bikin, jîyana xwe bi rêk bixin û xemgînîya xwe derbibirin li şûna mana di xeleka bendewarîyê de.
Bandora Derûnî ya Parvekirina Wêne an Vîdyoyên Şokdar
Şêwirmendê Derûnî dîyar jî kir ku belavkirina dîmenên şokdar ên qurbanîyan dibe sedema bandorên derûnî yên kûr li ser kesûkarên wan û belayê nû dike, û dibe ku bibe sedema Nexweşîya Piştî Belayê (PTSD) û pêvajoya başbûnê asteng bike, ku ev yek hişyarî û berpirsîyarîyê dixwaze.
Rêzgirtina li Rûmeta Qurbanîyan û Taybetmendîya Malbatên Wan
Şêwirmendê tekez kir ku rêzgirtina li rûmeta qurbanîyan û taybetmendîya malbatên wan prensîbeke bingehîn e, û bal kişand ser pabendbûna Desteya Niştimanî ya Windayan bi misogerkirina nepenîyê û pêşkêşkirina piştgirîya derûnî û civakî ji bo malbatên zirar dîtine di hemû qonaxên xebatê de.
Dozeke Derûnî û Civakî ya Kûr
Şêwirmendê her weha tekez kir ku doza windayan xwedî bandoreke derûnî ya kûr e li ser bi hezaran malbatên Sûrî, û destnîşan kir ku eşkerekirina çarenivîsa wan û pêşkêşkirina piştgirîya derûnî û civakî bingeha başbûn û hevgirtina civaka Sûrî ye.
