Şam-SANA
Wezareta Çandinîyê hejmarek rêkarên xweparastin û rêxistinî ji bo rûbirûbûna şewatên daristan û zevîyên çandinîyê di vê demsalê de girtine ser xwe. Ev yek bi hevahengîya ligel alîyên peywendîdar pêk tê, da ku asta amadebaşîya bersivdayîna bilez bilind bibe û zirarên hawirdorî û çandinîyê kêm bibin.
Rêveberê Daristanan di wezaretê de, Mejd Silêman, îro pêncşemê ji nûçegihana SANAyê re eşkere kir ku rêkarên xweparastinê şandina fermanan ji bo beşên daristanan li xwe digire, da ku ligel sazîyên giştî darên nexweş û hişk ên ku dibin sedema belavbûna agir bên rakirin. Her wiha piştrastkirina amadebûna çavkanîyên avê û rêdana tankerên agirkujîyê ji bo dagirtina avê di demsala şewatan de hatin destnîşankirin.
Silêman dîyar kir ku hejmarek navendên agirkujîyê hatine nûjenkirin, ji wan navenda Nehr El-Barid li Hamayê ku piştî rawestanê dîsa ketiye xizmetê. Her wiha çend çavkanîyên avê yên taybet bi tankerên agirkujîyê li deverên cuda yên Hamayê mîna Naûr Cûrîn, Tahûn El-Helewe, Nehr El-Barid û şitilgeha Selhebê hatine amadekirin.
